Sanctus Franciscus Xaverius. – Diarium Sanctorum a Reverendo Patre Joanne Stephano Grosez SJ conscriptum.

DIARIUM SANCTORUM

P. JOANNES STEPHANUS GROSEZ SI

––––––––––

S. FRANCISCUS XAVERIUS

CONFESSOR

III. DECEMBRIS

Factus sum infirmus, ut infirmos lucrifacerem. Omnibus omnia

factus sum, ut omnes facerem salvos. Paulus I. ad Cor. cap. 9.

S. Franciscus Xaverius, Indiarum apostolus, primus omnium fidei lumine Japones collustravit. Undecim centena hominum millia, eoque amplius reduxit ad ovile JESU Christi: mortuos suscitavit, sanavit aegrotos, marisque sedavit tempestates. Usque adeo sitiebat labores, ut in consolationibus, satis est, in laboribus, amplius, exclamaret. In Insula Sanciana non longe ab Sinarum regno, quo evangelium inferre meditabatur, obiit anno Christi 1552.

Meditatio in vitam S. Xaverii

1. Amore DEI, in exercitiis spiritualibus S. Ignatii, sic inflammatum est ingens Xaverii pectus, ut omnes posthac curas, ac cogitationes suas ad majorem DEI gloriam retulerit. O utinam! quibus Xaverius, iisdem ego flammis arderem! Amor coelestis accende, combure cor meum, patet ardoribus tuis! Procul hinc vani honores! procul coenosae voluptates, nugae nugarum! diutius me retinuistis. Ratione plenissimum est, illum, in quo habeas omnia, amare prae omnibus. Euch.

2. Amore proximi ad extremas mundi oras excurrit. Solatur aegrotos in nosodochiis, exsugit erumpentem ex ulceribus saniem. Quid multa? forti, et indefesso labore vacat omnium saluti. An pari charitate complector proximum? an ipsi praesto sum, tum animo, tum corpore laboranti?

3. Amore crucis vinctus, et martyr JESU Christi in Sinarum regno mori cupit. Omnibus omnino voluptatibus abstinet: nullum omittit poenitentiae genus, ut sua, aliorumve luat peccata. Amplius laborum, amplius dolorum semper petit; et ego, (quae mea ignavia est) ubi me minimus doloris aculeus pungit, statim clamo, satis est. Domine! quantumlibet caro reluctetur, auge, precor, dolorem, si prius auxeris patientiam, et amorem. Amplius Domine, amplius! (*)

–––––––––––

Diarium Sanctorum a Reverendo Patre Joanne Stephano Grosez e Societate Jesu conscriptum. Trimestre quartum. Tyrnaviae. TYPIS COLLEGII ACADEMICI SOCIET. JESU, ANNO M. DCC. LXXI. (1771), pp. 129-130.

Notae:

(*) Cf. S. Franciscus Xaverius, Uberrima Symboli declaratio. (Nota ab ed. Ultra montes).

POWRÓT DO STRONY GŁÓWNEJ: