DIVI THOMAE AQUINATIS

 

DOCTORIS ANGELICI

 

TOTIUS

 

SUMMAE THEOLOGICAE

 

CONCLUSIONES

 

–––––––––––––––––––––––

 

 

PRIMAE PARTIS

 

SUMMAE THEOLOGICAE

 

CONCLUSIONES

 

~~~~~~~~~~~~~~~~~~~~

 

QUAESTIO XCVI

 

De dominio quod homini in statu innocentiae competebat

 

IN 4 ARTICULOS DIVISA

 

1. – Utrum Adam in statu innocentiae animalibus dominaretur.

 

Co. – Adam in statu innocentiae cunctis dominabatur animalibus, quod ei omnia animalia naturaliter subjecta essent; verum in poenam inobedientiae hominis ad Deum, animalia quoque homini obedire contemnunt.

 

2. – Utrum homo habuisset dominium super omnes alias creaturas.

 

Co. – Homo non dominabatur angelis, sed animalibus, imperando; plantis vero et inanimatis, utendo absque ullo impedimento.

 

3. – Utrum homines in statu innocentiae fuissent aequales.

 

Co. – Necesse est in statu innocentiae aliquam disparitatem fuisse, saltem quoad sexum; potuit tamen in anima et corpore esse etiam aliqua inaequalitas.

 

4. – Utrum homo in statu innocentiae homini dominabatur.

 

Co. – Servitus peccati poena esse debet, non igitur in statu innocentiae homo homini dominaretur dominio servituti opposito, licet supereminentiam scientiae et justitiae habens alium ad proprium bonum ejus dirigeret.

 

–––––––––––

 

 

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), p. 60.

 
© Ultra montes (www.ultramontes.pl)
Cracovia MMXI, Kraków 2011

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: