DIVI THOMAE AQUINATIS

DOCTORIS ANGELICI

TOTIUS

SUMMAE THEOLOGICAE

CONCLUSIONES

–––––––––––––––––––––––

PRIMAE PARTIS

SUMMAE THEOLOGICAE

CONCLUSIONES

~~~~~~~~~~~~~~~~~~~~

QUAESTIO XCV

De his quae attinent ad voluntatem primi hominis, gratia scilicet et justitia

IN 4 ARTICULOS DIVISA

1. – Utrum primus homo fuerit creatus in gratia.

Co. – Cum primus homo sic factus fuerit ut ratio Deo subderetur, rationi vero inferiores vires, animae vero corpus, conveniens est illum in gratia fuisse creatum.

2. – Utrum in primo homine fuerint animae passiones.

Co. – Passiones circa bonum habitum vel tempore suo habendum, ut amor, gaudium, desiderium, et spes non affligens, in statu innocentiae fuerunt; caeterae quae malum respiciunt, ut timor et dolor, nullo modo in illo fuerunt.

3. – Utrum Adam habuerit omnes virtutes.

Co. – Cum in Adam tempore innocentiae ratio Deo fuerit subjecta, et rationi inferiores vires, aliqualiter omnes virtutes habuit; ac eas quidem secundum habitum et actum quae non includebant imperfectionem illi statui repugnantem, alias vero secundum habitum tantum.

4. – Utrum opera primi hominis fuerint minus efficacia ad merendum quam opera nostra.

Co. – Opera primi hominis efficaciora erant ad merendum quam nostra, si pensetur ratio meriti vel ex gratia vel ex quantitate operis absoluta; si vero ex quantitate proportionali, minus efficacia erant.

–––––––––––

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 59-60.

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: