DIVI THOMAE AQUINATIS

DOCTORIS ANGELICI

TOTIUS

SUMMAE THEOLOGICAE

CONCLUSIONES

–––––––––––––––––––––––

PRIMAE PARTIS

SUMMAE THEOLOGICAE

CONCLUSIONES

~~~~~~~~~~~~~~~~~~~~

QUAESTIO XLV

De modo emanationis rerum a primo principio

IN 8 ARTICULOS DIVISA

1. – Utrum creare sit ex nihilo aliquid facere.

Co. – Creare est ex nihilo aliquid facere.

2. – Utrum Deus possit aliquid creare.

Co. – Cum nihil in universitate entium sit non causatum ab ipso, non solum possibile sed necessarium est omnia a Deo creata esse.

3. – Utrum creatio sit aliquid in creatura.

Co. – Creatio in creatura non est nisi relatio quaedam ad creatorem ut ad principium.

4. – Utrum creari sit proprium compositorum et subsistentium.

Co. – Creari proprie subsistentibus in suo esse convenit, aliis vero concreari.

5. – Utrum solius Dei sit creare.

Co. – Cum ipsum esse, quod inter omnes effectus universalissimum est, terminus sit creationis, solum Dei est, qui prima et universalissima causa est.

6. – Utrum creare sit proprium alicujus personae.

Co. – Creare commune est toti Trinitati, et personis divinis nonnisi ut essentialia attributa includunt, scientiam scilicet et voluntatem, convenire potest.

7. – Utrum in creaturis sit necesse inveniri vestigium Trinitatis.

Co. – In rationalibus creaturis est imago Trinitatis; in caeteris vero creaturis est vestigium Trinitatis, inquantum in eis inveniuntur aliqua quae reducuntur in divinas personas.

8. – Utrum creatio admisceatur in operibus naturae et artis.

Co. – Creatio non admiscetur operibus naturae et artis, sed aliquid ad illarum operationem praesupponitur.

–––––––––––

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 29-30.

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: