DIVI THOMAE AQUINATIS

DOCTORIS ANGELICI

TOTIUS

SUMMAE THEOLOGICAE

CONCLUSIONES

–––––––––––––––––––––––

PRIMAE PARTIS

SUMMAE THEOLOGICAE

CONCLUSIONES

~~~~~~~~~~~~~~~~~~~~

QUAESTIO III

De Dei simplicitate

IN 8 ARTICULOS DIVISA

1. – Utrum Deus sit corpus.

Co. – Cum Deus sit primum movens immotum, ac primum ens, et omnium nobilissimum, impossibile est corpus esse illum.

2. – Utrum in Deo sit compositio formae et materiae.

Co. – Cum Deus sit actus purus, primum bonum et optimum, et primum agens simpliciter, non est aliqua materia in ipso.

3. – Utrum sit idem Deus quod sua essentia vel natura.

Co. – Cum Deus non sit ex materia et forma compositus, idem est quod sua essentia et natura.

4. – Utrum in Deo sit idem essentia et esse.

Co. – Deus, cum sit primum efficiens, ac actus purus, et ens simpliciter primum, essentiam indistinctam ab esse habet.

5. – Utrum Deus sit in genere aliquo.

Co. – Cum Deus sit actus purus, neque in eo esse ab essentia distinguatur, ac cujuscumque generis principium sit, in nullo directe vel reductive genere est.

6. – Utrum in Deo sint aliqua accidentia.

Co. – Cum Deus sit actus purus, ac ipsum esse, primumque ens ac prima causa, in eo nullum accidens esse potest.

7. – Utrum Deus sit omnino simplex.

Co. – Cum Deus sit primum ens, prima causa, actus purus, et ipsum esse, omni prorsus simplicitate gaudet.

8. – Utrum Deus in compositionem aliorum veniat.

Co. – Deus prima causa efficiens, ac primum simpliciter ens et agens cum sit, impossibile est eum in alicujus compositionem venire, vel ut mundi anima vel ut forma seu materia, ut quidam falso existimaverunt.

–––––––––––

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), p. 3.

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: