DIVI THOMAE AQUINATIS

 

DOCTORIS ANGELICI

 

TOTIUS

 

SUMMAE THEOLOGICAE

 

CONCLUSIONES

 

–––––––––––––––––––––––

 

 

PRIMAE PARTIS

 

SUMMAE THEOLOGICAE

 

CONCLUSIONES

 

~~~~~~~~~~~~~~~~~~~~

 

QUAESTIO XVI

 

De veritate

 

IN 8 ARTICULOS DIVISA

 

1. – Utrum veritas sit tantum in intellectu.

 

Co. – Verum cum sit termi­nus intellectus, sicut bonum appetitus, veritatem omnem in intellectu esse oportet principaliter, secundario autem in rebus secundum ordinem ad intel­lectum, a quo dependent.

 

2. – Utrum veritas sit tantum in intellectu componente et dividente.

 

Co. – Verum est tantum in intellectu componente vel dividente, non autem in sensu, vel in intellectu quid est rei concipiente.

 

3. – Utrum verum et ens convertantur.

 

Co. – Cum quodcumque sit cognoscibile et verum inquantum ens, verum ipsum cum ente converti necesse est, sicut et bonum; addit tamen verum ipsi enti ordinem ad intellectum.

 

4. – Utrum bonum secundum rationem sit prius quam verum.

 

Co. – Verum, cum propinquius sit enti quam bonum, et ipsam cognitionem respiciat, quae prior est appetitione quam respicit bonum, est prius secundum suam rationem quam bonum.

 

5. – Utrum Deus sit veritas.

 

Co. – Deus cum sit suum esse et intelligere, et mensura omnis esse et intellectus, in ipso non solum est veritas, sed ipse summa et prima veritas est.

 

6. – Utrum sit una sola veri­tas, secundum quam omnia sunt vera.

 

Co. – Veritas relata ad intellectum, in quo prius est quam in rebus, multiplicatur secundum intellectuum multiplicationem; relata vero ad res, nonnisi una est et prima, cujus ratione om­nia vera dicuntur.

 

7. – Utrum veritas creata sit aeterna.

 

Co. – Nulla creata veritas est aeterna, sed sola veritas divini intellectus, qui solus est aeternus et a quo ipsa ejus veritas indistincta est.

 

8. – Utrum veritas sit immutabilis.

 

Co. – Sola divini intellectus veritas immutabilis est, nostri vero mutabilis, in quo est opinionum alternatio, et quem res multae latent; veritas autem rerum naturalium immutabilis est.

 

–––––––––––

 

 

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 12-13.

 
© Ultra montes (www.ultramontes.pl)
Cracovia MMVIII, Kraków 2008

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: