DIVI THOMAE AQUINATIS

 

DOCTORIS ANGELICI

 

TOTIUS

 

SUMMAE THEOLOGICAE

 

CONCLUSIONES

 

–––––––––––––––––––––––

 

 

PRIMAE PARTIS

 

SUMMAE THEOLOGICAE

 

CONCLUSIONES

 

~~~~~~~~~~~~~~~~~~~~

 

QUAESTIO XII

 

Quomodo Deus a nobis cognoscatur

 

IN 13 ARTICULOS DIVISA

 

1. – Utrum aliquis intellectus creatus possit Deum videre per essentiam.

 

Co. – Cum ultima hominis beatitudo in altissima ejus operatione consistat, quae est clara divinae essentiae visio per intellectum, constat intellectum creatum Deum posse videre per essentiam.

 

2. – Utrum essentia Dei ab intellectu creato per aliquam similitudinem videatur.

 

Co. – Divina essentia non per aliquam speciem ex parte divinae essentiae ab intellectu creato conspicitur; sed ex parte intellectus creati aliqua similitudine confortati, lumine videlicet gloriae, apprehenditur et videtur.

 

3. – Utrum essentia Dei videri possit oculis corporalibus.

 

Co. – Deus, cum sit omnino incorporeus, nullo exteriori vel interiori sensu per se videri potest.

 

4. – Utrum aliquis intellectus creatus per sua naturalia divinam essentiam videre possit.

 

Co. – Cum divina essentia sit supra conditionem cujuscumque creati intellectus, non potest intellectus creatus per sua naturalia ipsam cognoscere, sed tantum per gratiam.

 

5. – Utrum intellectus creatus ad videndum Dei essentiam aliquo creato lumine indigeat.

 

Co. – Cum essentia divina naturam cujusque creati intel­lectus excedat, indiget creatus intellectus ad eam intuendam aliquo creato lumine.

 

6. – Utrum videntium essen­tiam Dei unus alio perfectius videat.

 

Co. – Cum videntium divi­nam essentiam unus alio majori gloriae lumine illustretur, per­fectius etiam unus alio ipsam videbit.

 

7. – Utrum videntes Deum per essentiam ipsum comprehendant.

 

Co. – Cum lumen gloriae, quo perfusi divinam intuentur essentiam, infinitum non sit, impossibile est quemquam creatum intellectum illam comprehendere, et ipsam cognoscere quantum cognoscibilis est.

 

8. – Utrum videntes Deum per esssentiam omnia in Deo videant.

 

Co. – Cum nullus intellectus creatus videndo Deum illum comprehendat, non potest etiam in ipso videre omnia quae facit vel facere potest, sed plura vel pauciora secundum quod perfectius vel imperfectius eum videt.

 

9. – Utrum ea quae videntur in Deo a videntibus divinam essen­tiam per aliquas similitudines videantur.

 

Co. – Deum videntes non alia vident in eo per species eorum, sed per ipsam essen­tiam divinam, suo intellectui unitam.

 

10. – Utrum videntes Deum per essentiam simul videant omnia quae in ipso vident.

 

Co. – Quaecumque videntur in Verbo, non successive sed simul videri necesse est.

 

11. – Utrum aliquis in hac vita possit videre Deum per essentiam.

 

Co. – Non potest Deus ab homine puro in hac mortali vita per essentiam videri.

 

12. – Utrum per rationem naturalem Deum in hac vita cognoscere possimus.

 

Co. – Possumus Deum in hac vita naturali lumine cognoscere secundum quod omnium prima et eminentissima causa est, non autem secundum quod in se est.

 

13. – Utrum per gratiam habeatur altior cognitio Dei quam ea quae habetur per rationem naturalem.

 

Co. – Perfectior cognitio de Deo in hac vita habetur per gratiam quam per naturalem rationem.

 

–––––––––––

 

 

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 7-9.

 
© Ultra montes (www.ultramontes.pl)
Cracovia MMVIII, Kraków 2008

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: