DIVI THOMAE AQUINATIS

DOCTORIS ANGELICI

TOTIUS

SUMMAE THEOLOGICAE

CONCLUSIONES

–––––––––––––––––––––––

PRIMAE PARTIS

SUMMAE THEOLOGICAE

CONCLUSIONES

~~~~~~~~~~~~~~~~~~~~

QUAESTIO CXVII

De pertinentibus ad hominis actionem

IN 4 ARTICULOS DIVISA

1. – Utrum unus homo possit alium docere.

Co. – Potest unus homo alium docere, vel proponendo ei auxilia quibus manuducatur in cognitionem veritatis ignotae, vel confortando ejus intellectum quo possit ex principiis conclusiones deducere.

2. – Utrum homines possint docere angelos.

Co. – Quemadmodum angeli inferiores nequeunt illuminare superiores, ita homines viatores nullos omnino angelos illuminare possunt, quamvis eis loquantur.

3. – Utrum homo per virtutem animae possit corporalem materiam immutare.

Co. – Cum materia corporalis non immutetur ad formam nisi vel ab agente aliquo composito ex materia et forma, vel ab ipso Deo, illam anima non potest sua virtute naturali immutare.

4. – Utrum anima hominis separata possit corpora saltem localiter movere.

Co. – Cum anima corpori unita naturali sua virtute nullum corpus nisi a se vivificatum movere queat, anima autem separata nullum corpus vivificet, nullum potest naturali sua virtute localiter movere.

–––––––––––

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 72-73.

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: