DIVI THOMAE AQUINATIS

 

DOCTORIS ANGELICI

 

TOTIUS

 

SUMMAE THEOLOGICAE

 

CONCLUSIONES

 

–––––––––––––––––––––––

 

 

PRIMAE PARTIS

 

SUMMAE THEOLOGICAE

 

CONCLUSIONES

 

~~~~~~~~~~~~~~~~~~~~

 

QUAESTIO CVIII

 

De ordinatione angelorum secundum hierarchias et ordines

 

IN 8 ARTICULOS DIVISA

 

1. – Utrum omnes angeli sint unius hierarchiae.

 

Co. – Ex parte principis, unius scilicet Dei, omnes angeli et rationales creaturae unius sunt hierarchiae; ex parte vero multitudinis ordinatae sub principe, angeli nec cum hominibus nec inter se sunt unius hierarchiae; sed ipsi inter se angeli tres constituunt hierarchias.

 

2. – Utrum in una hierarchia sint plures ordines.

 

Co. – In omni hierarchia distinguuntur tres ordines diversi: summus, medius, et infimus, secundum varia angelorum officia et actus.

 

3. – Utrum in uno ordine sint plures angeli.

 

Co. – Multi angeli sunt in uno ordine nobis noto, sed quilibet angelus proprium habet ordinem nobis incognitum.

 

4. – Utrum distinctio hierarchiarum et ordinum sit a natura in angelis.

 

Co. – Secundum finem naturalem distinguuntur ordines in angelis per naturalia dona, secundum supernaturalem vero finem completive per dona gratuita et dispositive per naturalia distinguuntur; in hominibus vero per dona gratuita tantum.

 

5. – Utrum ordines angelorum convenienter nominentur.

 

Co. – Novem angelorum ordines: Seraphim, Cherubim, Throni, Dominationes, Virtutes, Potestates, Principatus, Archangeli et Angeli, convenienter, secundum convenientiam scilicet ad spiritales eorum perfectiones et ministeria, nominantur.

 

6. – Utrum convenienter gradus ordinum assignentur.

 

Co. – Pro diversitate expositionis nominum ipsorum ordinum in angelis, non male, etiam secundum Scripturas, differenter gradus quorumdam ordinum a Dionysio et Gregorio assignantur.

 

7. – Utrum ordines remanebunt post diem judicii.

 

Co. – Remanebunt angelici ordines post diem judicii quoad graduum distinctionem, quoad executionem vero suorum officiorum partim remanebunt et partim non.

 

8. – Utrum homines assumantur ad ordines angelorum.

 

Co. – Quamvis semper mansurum sit naturarum in hominibus et angelis discrimen, tamen per donum gratiae tantam gloriam qua angelis secundum singulos gradus aequentur homines mereri possunt: quod est homines ad ordines angelorum assumi.

 

–––––––––––

 

 

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 66-67.

 
© Ultra montes (www.ultramontes.pl)
Cracovia MMXI, Kraków 2011

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: