DIVI THOMAE AQUINATIS

DOCTORIS ANGELICI

TOTIUS

SUMMAE THEOLOGICAE

CONCLUSIONES

–––––––––––––––––––––––

PRIMAE PARTIS

SUMMAE THEOLOGICAE

CONCLUSIONES

~~~~~~~~~~~~~~~~~~~~

QUAESTIO CIII

De gubernatione rerum in communi

IN 8 ARTICULOS DIVISA

1. – Utrum mundus gubernetur ab aliquo.

Co. – Cum omnia quae sunt in mundo certos et determinatos fines consequantur, a divina sapientia regantur necesse est.

2. – Utrum finis gubernationis mundi sit aliquid extra mundum.

Co. – Cum principium rerum sit externum, oportet et finem gubernationis mundi esse aliquid extra mundum.

3. – Utrum mundus gubernetur ab uno.

Co. – Cum finis gubernationis mundi sit optimum bonum, necesse est ipsum ab uno gubernari.

4. – Utrum effectus gubernationis sit unus tantum, et non plures.

Co. – Principalis finis gubernationis unus est, generales fines sunt duo, et in particulari sunt innumerabiles.

5. – Utrum omnia divinae gubernationi subdantur.

Co. – Cum Deus sit effectiva causa omnium, necesse est ut omnia divinae providentiae subdantur, non solum superiora, sed omnia humana et inferiora.

6. – Utrum omnia immediate gubernentur a Deo.

Co. – Gubernantur omnia immediate a Deo secundum rationem gubernationis; quoad executionem vero, quaedam mediantibus aliis gubernantur.

7. – Utrum aliquid praeter ordinem divinae gubernationis contingere possit.

Co. – Cum divina providentia sit universalis causa non unius tantum generis sed universaliter totius entis, nihil potest praeter illius ordinem in universo evenire.

8. – Utrum aliquid possit reniti contra ordinem gubernationis divinae.

Co. – Cum unumquodque operatione sua ad bonum tendat, licet possit a determinato ordine boni declinare, constat nihil contra niti divinae ordinationi in generali, sed tantum in speciali.

–––––––––––

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), p. 63.

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: