DIVI THOMAE AQUINATIS

 

DOCTORIS ANGELICI

 

TOTIUS

 

SUMMAE THEOLOGICAE

 

CONCLUSIONES

 

–––––––––––––––––––––––

 

 

PRIMAE SECUNDAE

 

SUMMAE THEOLOGICAE

 

CONCLUSIONES

 

~~~~~~~~~~~~~~~~~~~~

 

QUAESTIO IX

 

De motivo voluntatatis

 

IN 6 ARTICULOS DIVISA

 

1. – Utrum voluntas moveatur ab intellectu.

 

Co. – Movet intellectus voluntatem non quoad exercitium actus, sed quoad specificationem; voluntas vero omnes potentias movet quoad exercitium.

 

2. – Utrum voluntas moveatur ab appetitu sensitivo.

 

Co. – Cum secundum passionem appetitus sensitivi immutetur homo ad aliquam dispositionem, recte dicitur voluntas ex parte objecti ab appetitu sensitivo moveri.

 

3. – Utrum voluntas moveat seipsam.

 

Co. – Voluntas, finem et bonum volendo, seipsam movere potest ad volendum ea quae ad finem sunt.

 

4. – Utrum voluntas moveatur ab aliquo exteriori principio.

 

Co. – Non tantum ex appetitu boni et finis ipsa voluntas movetur, sed necessarium est ut ab exteriori objecto moveatur in suum primum actum.

 

5. – Utrum voluntas moveatur a corpore coelesti.

 

Co. – Cum voluntas sit potentia omnino immaterialis et incorporea, non potest nisi indirecte a corporibus coelestibus moveri.

 

6. – Utrum voluntas moveatur a Deo solo sicut ab exteriori principio.

 

Co. – Cum humana voluntas sit animae rationalis potentia ad universale bonum ordinem habens, non potest nisi a Deo ut ab exteriori principio moveri.

 

–––––––––––

 

 

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 82-83.

 
© Ultra montes (www.ultramontes.pl)
Cracovia MMXIII, Kraków 2013

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: