DIVI THOMAE AQUINATIS

DOCTORIS ANGELICI

TOTIUS

SUMMAE THEOLOGICAE

CONCLUSIONES

–––––––––––––––––––––––

PRIMAE SECUNDAE

SUMMAE THEOLOGICAE

CONCLUSIONES

~~~~~~~~~~~~~~~~~~~~

QUAESTIO LXXVII

De causa peccati ex parte appetitus sensitivi

IN 8 ARTICULOS DIVISA

1. – Utrum voluntas moveatur a passione appetitus sensitivi.

Co. – Passiones appetitus sensitivi ipsam voluntatem, cum immaterialis sit potentia, nonnisi indirecte trahere et ad malum impellere possunt, eam videlicet a propria functione distrahendo vel rectum rationis judicium impediendo.

2. – Utrum ratio possit superari a passione contra suam scientiam.

Co. – Saepe possunt passiones appetitus sensitivi rationem et ejus universalem scientiam impedire, vel per modum distractionis, vel ad contrarium impellendo, vel aliquam corporalem transmutationem causando ex qua vel totaliter impediatur vel ex parte saltem ligetur rationis usus.

3. – Utrum peccatum quod est ex passione debeat dici ex infirmitate.

Co. – Cum passiones sint quaedam animae aegritudines rationis regulam impedientes, quaecumque peccata ex passione procedunt quasi ex illius infirmitate procedere dicuntur.

4. – Utrum amor sui sit principium omnis peccati.

Co. – Cum omne peccatum ex inordinato appetitu alicujus boni proveniat, inordinatus etiam sui amor, qui appetitum illum in se includit, causa est et initium omnis peccati.

5. – Utrum convenienter ponantur causae peccatorum concupiscentia carnis, concupiscentia oculorum, et superbia vitae.

Co. – Quum triplex sit appetitus boni inordinatus, qui causa est omnis peccati, tres etiam esse peccatorum causas: concupiscentiam carnis, concupiscentiam oculorum et superbiam vitae, fatendum est.

6. – Utrum peccatum allevietur propter passiones.

Co. – Passiones antegressae actum peccati quo sunt vehementiores eo magis peccatum minuunt: sed e contra subsequentes eo magis augent peccatum quo vehementiores.

7. – Utrum passio totaliter excuset a peccato.

Co. – Passiones quae usum rationis prorsus tollunt, ab omni culpa excusant; nisi fortasse passiones istae fuerint voluntariae, quo casu et peccata sequentia homini imputantur.

8. – Utrum peccatum quod est ex passione possit esse mortale.

Co. – Peccatum ex passione procedens potest nonnunquam mortale esse, cum quis ex passione ad actum exteriorem peccati procedit.

–––––––––––

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 127-128.

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: