DIVI THOMAE AQUINATIS

DOCTORIS ANGELICI

TOTIUS

SUMMAE THEOLOGICAE

CONCLUSIONES

–––––––––––––––––––––––

PRIMAE SECUNDAE

SUMMAE THEOLOGICAE

CONCLUSIONES

~~~~~~~~~~~~~~~~~~~~

QUAESTIO LVI

De subjecto virtutis

IN 6 ARTICULOS DIVISA

1. – Utrum virtus sit in potentia animae sicut in subjecto.

Co. – Virtus humana cum sit perfectio et habitus operativus, est in potentia animae tanquam in proprio subjecto.

2. – Utrum una virtus possit esse in pluribus potentiis.

Co. – Impossibile est unam virtutem esse in duabus potentiis, nisi ordinem ad invicem habeant in participatione illius.

3. – Utrum intellectus possit esse subjectum virtutis.

Co. – Cum virtus sit quae simpliciter et actu bonum facit habentem et opus ejus bonum reddit, impossibile est intellectum esse subjectum virtutis simpliciter, nisi secundum ordinem ad voluntatem, quae virtutis simpliciter subjectum est.

4. – Utrum irascibilis et concupiscibilis sint subjectum virtutis.

Co. – In irascibili et concupiscibili, ut sunt potestates appetitus sensitivi, nulla virtus est; sed ut subordinantur rationi, necesse est in utraque aliquam virtutem esse, quae quaedam est illarum ad rationem ipsam habitualis conformitas.

5. – Utrum vires apprehensivae sensitivae sint subjectum virtutis.

Co. – Cum virtus sit habitus perfectus quo bonum opus tantum operari contingit, in viribus apprehensivis non est virtus qua verum cognoscitur.

6. – Utrum voluntas possit esse subjectum virtutis.

Co. – Virtutes quae ordinant affectum hominis in Deum vel in proximum sunt in voluntate sicut in subjecto, ut charitas, justitia, et hujusmodi.

–––––––––––

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), p. 111.

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: