DIVI THOMAE AQUINATIS

 

DOCTORIS ANGELICI

 

TOTIUS

 

SUMMAE THEOLOGICAE

 

CONCLUSIONES

 

–––––––––––––––––––––––

 

 

PRIMAE SECUNDAE

 

SUMMAE THEOLOGICAE

 

CONCLUSIONES

 

~~~~~~~~~~~~~~~~~~~~

 

QUAESTIO XLVI

 

De ira secundum se

 

IN 8 ARTICULOS DIVISA

 

1. – Utrum ira sit specialis passio.

 

Co. – Ira non est passio generalis quod causa sit multarum passionum, sed condividitur aliis animae passionibus; est autem generalis passio prout ex concursu multarum passionum causatur.

 

2. – Utrum objectum irae sit bonum vel malum.

 

Co. – Cum irae motus in vindictam ut bonum, et in eum de quo vindicta quaeritur ut contrarium et nocivum tendat, ipsam non tantum bonum sed et malum pro objecto respicere dicendum est.

 

3. – Utrum ira sit in concupiscibili.

 

Co. – Ira cum respiciat vindictam et eum de quo vindicta quaeritur, cum quadam arduitate, in vi irascibili est; non autem in concupiscibili, cujus passiones bonum vel malum respiciunt absolute.

 

4. – Utrum ira sit cum ratione.

 

Co. – Ira cum sit appetitus vindictae, poenaeque infligendae cum nocumento illato collationem importet, non sine ratione est.

 

5. – Utrum ira sit naturalior quam concupiscentia.

 

Co. – Cum ira sit cum ratione magis quam concupiscentia, naturalium etiam est et secundum naturam speciei, scilicet inquantum est rationalis et individui; sed secundum naturam generis, id est animalis, et ex parte objecti, concupiscentia naturalior est quam ira.

 

6. – Utrum ira sit gravior quam odium.

 

Co. – Cum odii objectum sit malum sub ratione mali, irae vero sub ratione boni, odium multo deterius et gravius est quam ira.

 

7. – Utrum ira sit ad illos solum ad quos est justitia.

 

Co. – Cum inferre vindictam ad justitiam spectet, non alios ira respicit nisi ad quos justitia est.

 

8. – Utrum convenienter assignentur species irae.

 

Co. – Tres sunt irae species: fel, mania, et furor, quae sumuntur secundum ea quae dant irae aliquod augmentum.

 

–––––––––––

 

 

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 105-106.

 

© Ultra montes (www.ultramontes.pl)
Cracovia MMXVI, Kraków 2016

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: