DIVI THOMAE AQUINATIS

 

DOCTORIS ANGELICI

 

TOTIUS

 

SUMMAE THEOLOGICAE

 

CONCLUSIONES

 

–––––––––––––––––––––––

 

 

PRIMAE SECUNDAE

 

SUMMAE THEOLOGICAE

 

CONCLUSIONES

 

~~~~~~~~~~~~~~~~~~~~

 

QUAESTIO XXXV

 

De dolore seu tristitia secundum se

 

IN 8 ARTICULOS DIVISA

 

1. – Utrum dolor sit passio animae.

 

Co. – Dolor, cum sit appetitus sensitivi motus consequens apprehensionem mali, propriissime passio animae est.

 

2. – Utrum tristitia sit idem quod dolor.

 

Co. – Si dolor accipiatur pro corporali dolore, quod usitatius est, dividitur contra tristitiam secundum distinctionem apprehensionis interioris et exterioris; si vero dolor accipiatur communiter, genus est tristitiae.

 

3. – Utrum tristitia sit contraria delectationi.

 

Co. – Delectatio et tristitia ex suis objectis contrariantur invicem.

 

4. – Utrum omnis tristitia omni delectationi contrarietur.

 

Co. – Tristitia et delectatio secundum suum genus universaliter contrariantur; similiter si de eodem secundum speciem; nonnunquam vero non contrariae secundum speciem, sed magis diversae vel disparatae dicuntur, si de diversis et disparatis sint; quando vero de contrariis, tunc nullo modo pugnant.

 

5. – Utrum delectationi contemplationis sit aliqua tristitia contraria.

 

Co. – Delectationi quae de ipsa contemplatione est, nulla tristitia contraria est, nec ei admiscetur nisi per accidens.

 

6. – Utrum magis sit fugienda tristitia quam delectatio appetenda.

 

Co. – Quia delectatio integra et perfecta esse potest, tristitia autem semper est secundum partem, manifestum est majorem esse naturaliter delectationis appetitum quam tristitiae fugam, etsi per accidens contingat quod aliquis magis tristitiam fugiat quam delectationem appetat.

 

7. – Utrum dolor exterior sit major quam interior.

 

Co. – Cum dolores exteriores voluntarie a quibusdam suscipiantur ut interiores evitentur, signum est interiorem dolorem esse exteriori majorem.

 

8. – Utrum sint tantum quatuor species tristitiae.

 

Co. – Quatuor sunt tristitiae species: acedia, anxietas, misericordia, atque invidia.

 

–––––––––––

 

 

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 99-100.

 

© Ultra montes (www.ultramontes.pl)
Cracovia MMXV, Kraków 2015

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: