Professio fidei pro haereticis, in gremium Ecclesiae catholicae transeuntibus
SACRA CONGREGATIO ROMANAE ET UNIVERSALIS INQUISITIONIS SEU SANCTI OFFICII
––––––
Ego N. N., coram me habens sancta Evangelia, quae mea manu tango, et sciens, neminem salvari posse extra fidem, quam tenet, credit, praedicat et docet sancta catholica et apostolica Ecclesia Romana, doleo, quod contra hanc fidem graviter erraverim, eo quod, natus extra Ecclesiam, habuerim et tenuerim doctrinas ipsius doctrinae contrarias.
Nunc vero, illuminatus gratia Dei, profiteor me credere, sanctam Romanam Ecclesiam catholicam et apostolicam esse unicam et veram Ecclesiam a Christo Jesu hac in terra fundatam, eique me ex toto corde submitto. Credo igitur omnes articulos, quos ipsa mihi credendos proponit; reprobo et condemno omnia, quae ipsa reprobat et condemnat, atque paratum me declaro ad servanda omnia quae ipsa mihi mandaverit.
Speciatim profiteor et credo: Unum Deum in tribus personis distinctis quidem sed aequalibus, Patrem, Filium et Spiritum Sanctum.
(Credo) catholicam doctrinam de Incarnatione, Passione, Morte, et Resurrectione Domini nostri Jesu Christi, hypostaticam duarum naturarum unionem, divinae naturae et humanae; divinam maternitatem Beatissimae Virginis Mariae simul cum eius integerrima Virginitate atque immaculata conceptione.
(Credo) praesentiam veram, realem et substantialem Corporis simul cum Anima et Divinitate Domini Nostri Jesu Christi in sanctissimo Eucharistiae Sacramento.
(Credo) Septem sacramenta instituta a Christo Jesu pro salute generis humani, videlicet: baptismum, confirmationem, Eucharistiam, poenitentiam, extremam unctionem, ordinem, matrimonium.
(Credo) purgatorium, resurrectionem mortuorum, vitam aeternam.
(Credo) primatum Romani Pontificis, successoris S. Petri principis apostolorum et vicarii Jesu Christi (Vicario di Gesù Cristo infallibile) (a), primatum non honoris tantum, sed etiam iurisdictionis.
(Credo) cultum Sanctorum eorumque imaginum.
(Credo) auctoritatem tum apostolicae et ecclesiasticae Traditionis, tum sacrarum Scripturarum, quas non debemus interpretari et intelligere nisi eo sensu, quem tenuit ac tenet Sancta Mater Ecclesia catholica.
Credo reliqua omnia, quae a sacris canonibus et oecumenicis Conciliis, speciatim a sacrosancto Concilio Tridentino et Concilio Vaticano definita et declarata sunt.
Dein corde sincero et fide non ficta detestor et abiuro omnem errorem, omnem haeresim et sectam, quae supradictae Sanctae Romanae Ecclesiae catholicae et apostolicae contraria est. Sic me Deus adiuvet et haec sancta Dei Evangelia, quae mea manu tango.
–––––––––––
Manuale sacerdotum: diversis eorum usibus tum in privata devotione, tum in functionibus liturgicis et sacrementorum administratione. Accomodavit P. Josephus Schneider, S. J., Sacr. Congreg. Indulg. et S. Reliqu. Consultor. Editio sexta decima. Cura et studio Augustini Lehmkuhl, S. J., SUPERIORIBUS ECCL. APPROBANTIBUS. Coloniae, SUMPTIBUS ET TYPIS JOANNIS PETRI BACHEMII. 1905, Pars II. Liturgica et pastoralis, pp. 412-413. (1)
Notae:
(1) S. Offic. dicto decr. 20. Julii
1859 pro America septemtr. aliam formulam professionis fidei praescripsit, quam
hic subnecto translatam in linguam latinam (ex Collect. S. C. de Prop. fid. ed. anni 1893, No. 1689) (a). – Manuale
sacerdotum: diversis eorum usibus tum in privata devotione, tum in functionibus
liturgicis et sacrementorum administratione. Accomodavit P. Josephus
Schneider, S. J., Editio sexta decima. Cura et studio Augustini Lehmkuhl, S. J.,
Coloniae 1905, Pars II, p. 412. (2)
(a) In editione Collectanea S. Congregationis de Propaganda
Fide... anni 1907 additum est verbum infallibile:
"Credo tutti gli articoli che essa mi propone a credere; riprovo e
condanno tutto ciò che essa riprova e condanna, e sono pronto ad osservare
tutto ciò che essa mi comanda, e specialmente professo di credere: (...) Il Primato
non solo di onore, ma anche di giurisdizione del Romano Pontefice, successore
di S. Pietro Principe degli Apostoli, e Vicario di Gesù Cristo infallibile". – Collectanea S.
Congregationis de Propaganda Fide seu decreta, instructiones, rescripta pro
apostolicis missionibus. Vol. I. Ann. 1622-1866. NN. 1-1299. Romae. Ex
Typographia Polyglotta S. C. de Propaganda Fide. MCMVII (1907), p. 643, n.
1178. (Nota ab ed. Ultra montes).
(2) Cf. 1) Kongregacja Św. Inkwizycji, Confessio fidei pro haereticis, in gremium Ecclesiae catholicae transeuntibus – Wyznanie Wiary dla heretyków przechodzących na łono Kościoła katolickiego.
2) Codex Iuris Canonici. Pius Papa IV, Professio Catholicae Fidei (Wyznanie Wiary katolickiej).
3) Urbanus Papa VIII, Benedictus Papa XIV, Professio Fidei Orientalibus praescripta (Wyznanie Wiary dla chrześcijan wschodnich).
4) P. Ferdinandus Cavallera SI, Thesaurus doctrinae catholicae ex documentis Magisterii ecclesiastici.
5) S. Pius Papa V, Catechismus Romanus ex decreto Concilii Tridentini (Katechizm Rzymski według uchwały świętego Soboru Trydenckiego).
6) Gregorius Papa XIII, Martyrologium Romanum.
7) S. Robertus Cardinalis Bellarminus SI, Doctor Ecclesiae, a) Compendium Doctrinae Christianae (Katechizm mniejszy czyli Nauka Chrześcijańska krótko zebrana). b) Catechismus, seu: Explicatio doctrinae christianae (Wykład nauki chrześcijańskiej).
8) S. Petrus Canisius SI, Doctor Ecclesiae, a) Catechismus maior seu Summa doctrinae christianae. b) Catechismi Latini et Germanici.
9) Petrus Cardinalis Gasparri, Catechismus catholicus (Katechizm katolicki).
10) S. Franciscus Xaverius, Uberrima Symboli declaratio.
11) P. Christianus Pesch SI, Compendium Theologiae dogmaticae.
12) Pius Papa XII, Enchiridion indulgentiarum. Preces et pia opera in favorem omnium christifidelium vel quorumdam coetuum personarum indulgentiis ditata et opportune recognita.
13) S. Pius Papa X, Iusiurandum contra errores modernismi (Przysięga antymodernistyczna).
(Nota ab ed. Ultra montes).
( PDF )
© Ultra montes (www.ultramontes.pl)
Cracovia MMXXV, Kraków 2025
POWRÓT DO STRONY GŁÓWNEJ: