MEDULLA S. THOMAE AQUINATIS
PER OMNES ANNI LITURGICI DIES DISTRIBUTA
SEU
MEDITATIONES
EX
OPERIBUS S. THOMAE
DEPROMPTAE
AUCTORE
P. D. MÉZARD
ORDINIS PRAEDICATORUM
––––––––
PRIMA PARS
––
DE TEMPORE ADVENTUS AD FESTUM SS. CORDIS JESU
–––––
23 Decembris
De quatuor utilitatibus Incarnationis
Sunt quatuor utilitates Dominicae Incarnationis.
1° Humanae naturae exaltatio. Cant. 8, 1: Quis mihi det ut inveniam te foris? Gloss. Intus erat dilectus quando in principio erat Verbum; foris fuit quando Verbum caro factum est. Ut deosculer te, id est facie ad faciem videam te, et ore ad os loquar ad te; et jam nemo me despiciat. Gloss. Postquam Christus venit suis infundens spiritum libertatis, etiam Ecclesia ab Angelis honoratur. Unde Apoc. 22, 9. Joanni volenti se adorare, dixit Angelus: Vide ne feceris, conservus tuus sum. Leo Papa: Agnosce, Christiane, dignitatem tuam, et divinae consors factus naturae, noli in veterem vilitatem degeneri conversatione redire.
2° Adoptio filiorum. Gal. 4, 4: Misit Deus Filium suum et infra: ut adoptionem filiorum reciperemus. Aug.: Ideo Filius Dei factus est filius hominis, ut homines faceret filios Dei. Item: Multos filios Dei fecit unicus filius. Emit enim sibi fratres sanguine suo, probavit reprobatus, redemit venditus, honoravit injuriatus, vivificavit occisus; dubietas nulla, dabit tibi bona sua, qui non dedignatus est recipere mala tua.
Notandum vero quod filiatio adoptionis est quaedam similitudo filiationis naturalis. Filius autem Dei naturaliter procedit a Patre, ut Verbum intellectuale unum cum ipso existens. Porro assimilatur creatura verbo aeterno secundum unitatem quam habet ad Patrem, quae fit per gratiam et charitatem. Unde Dominus orat Joan. 17, 21: Oro ut ipsi in nobis unum sint, sicut tu Pater in me et ego in te. Et talis assimilatio perficit rationem adoptionis, quia sic assimilatis debetur haereditas.
3° Interna mentis refectio. Aug. Ut panem angelorum manducaret homo, creator Angelorum factus est homo. Bernard. Manna de coelo descendit, gaudeant esurientes. Positum in praesepio, dicit Glossa: ut nos carnis suae frumento satiaret.
4° Beatitudinis augmentatio. Joan. 10, 9: Per me si quis introierit, salvabitur et ingredietur et egredietur, et pascua inveniet. August. Propterea Deus factus est homo, ut hominem totum in se beatificaret, tota hominis conversio ad ipsum esset, et tota dilectio esset in ipso, cum a sensu carnis videretur per carnem, et a sensu mentis per divinitatis contemplationem. Et hoc totum bonum hominis erat, ut sive ingrederetur, sive egrederetur, pascua in factore suo inveniret, foris in carne Salvatoris, intus in divinitate Creatoris.
(De humanitate Christi).
–––––––––––
Medulla S. Thomae Aquinatis per omnes anni liturgici dies distributa seu meditationes ex operibus S. Thomae depromptae. Auctore P. D. Mézard, Ordinis Praedicatorum. Tomus I. Parisiis [1906], pp. 60-62.
© Ultra montes (www.ultramontes.pl)
Cracovia MMXVI, Kraków 2016
Reditus ad indicem operis P. D. Mézard OP
POWRÓT DO STRONY GŁÓWNEJ: