MEDULLA S. THOMAE AQUINATIS
PER OMNES ANNI LITURGICI DIES DISTRIBUTA
SEU
MEDITATIONES
EX
OPERIBUS S. THOMAE
DEPROMPTAE
AUCTORE
P. D. MÉZARD
ORDINIS PRAEDICATORUM
––––––––
PRIMA PARS
––
DE TEMPORE ADVENTUS AD FESTUM SS. CORDIS JESU
–––––
22 Decembris
De Rore coelesti
Rorate coeli desuper et nubes pluant justum; aperiatur terra et germinet Salvatorem. Isa. 45, 8.
Hic propheta tria indicat de Christi nativitate, nativitatis principium, nascentis ortum, nativitatis fructum.
I. – Principium triplex est.
Primum, coelum rorans, quasi principium effectivum, scilicet operatio trium Personarum, propter quod pluraliter coeli. Pater Filium mittendo; Filius carnem assumendo; Spiritus sanctus conceptionem faciendo.
Secundum principium est nubes pluens, quod est principium praeparativum, in quo accipitur annuntiantis angeli officium. Ps. 103, 3: Ponis nubem ascensum tuum.
Tertium principium est terra germinans, quod est principium conceptivum, scilicet Beata Virgo de qua in Ps. 84, 13: Terra nostra dabit fructum suum, cujus aperiatur affectus ad inveniendum gratiae privilegium: Ne timeas, Maria invenisti gratiam; intellectus, ad credendum angeli verbum; uterus, ad concipiendum Dei Filium.
II. – Ortus vero comparatur rori, pluviae et germini, quia Christus est ros ad refrigerandum; sicut nubes roris in die messis (Isa. 18, 4); pluvia ad fecundandum: Descendet sicut pluvia in vellus (Ps. 71, 6). Quomodo nubes et nix descendit de coelo, et illuc ultra non revertitur, sed inebriat terram, et infundit eam, et germinare eam facit, et dat semen serenti et panem comedenti, sic erit Verbum meum, non revertetur ad me vacuum, sed faciet quaecumque volui, et prosperabitur in his ad quae misi illud (Isa. 55, 10); germen ad fructificandum, Jer. 23, 5: Suscitabo David germen justum.
III. – Fructus nativitatis est justitia quae cum illo oritur tripliciter: quam opere implevit: Sic decet nos implere omnem justitiam (Matth. 3, 15); quam sermone docuit: Ego qui loquor justitiam, et propugnator sum ad salvandum (Isa. 63, 1); quam in munere dedit, I Cor. 1, 30: Factus est nobis sapientia, et sanctificatio et justitia, et redemptio, ut quemadmodum scriptum est: qui gloriatur, in Domino glorietur.
(In Isa., c. 45).
–––––––––––
Medulla S. Thomae Aquinatis per omnes anni liturgici dies distributa seu meditationes ex operibus S. Thomae depromptae. Auctore P. D. Mézard, Ordinis Praedicatorum. Tomus I. Parisiis [1906], pp. 58-60.
© Ultra montes (www.ultramontes.pl)
Cracovia MMXVI, Kraków 2016
Reditus ad indicem operis P. D. Mézard OP
POWRÓT DO STRONY GŁÓWNEJ: