MEDULLA S. THOMAE AQUINATIS
PER OMNES ANNI LITURGICI DIES DISTRIBUTA
SEU
MEDITATIONES
EX
OPERIBUS S. THOMAE
DEPROMPTAE
AUCTORE
P. D. MÉZARD
ORDINIS PRAEDICATORUM
––––––––
PRIMA PARS
––
DE TEMPORE ADVENTUS AD FESTUM SS. CORDIS JESU
–––––
16 Decembris
De dono Filii Dei in Incarnatione
In hoc apparuit charitas Dei in nobis, quoniam Filium suum unigenitum misit Deus in mundum ut vivamus per eum. I Joan. 4, 9.
In hoc, velut certissimo signo, apparuit charitas Dei in nobis, id est ostensa est erga nos; quoniam Filium, non servum. Gregorius: Nonne ineffabilis est dilectio charitatis, ut servum redimens, Filium tradiderit: suum, sibi consubstantialem, proprium, naturalem, non adoptivum. Unigenitum, non ex multis unum; misit Deus Pater, scilicet qui tantus est ad tantillos: in mundum, imo pro mundo salvando; ut vivamus, prius mortui; per eum ressuscitati. Eph. 2: Propter nimiam charitatem qua dilexit nos, cum essemus mortui peccatis, convivificavit nos.
Nota quod tangit quatuor rationes, quare donum debet esse gratum et acceptum.
Prima est ex parte dantis, quando ille qui dat, dat ex magno amore et dilectione. Unde aliquando non tantum curatur de hoc quod datur quam de affectu personae dantis. Et certe istud donum datum est nobis ex maxima dilectione seu charitate Patris. Haec ratio notatur cum dicitur: In hoc apparuit caritas Dei.
Secunda ratio est ex parte dati sive missi. Quando illud quod datur est magnum et pretiosum, debet esse multum gratum et acceptum et placitum. Et certe istud fuit maximum; quod notatur cum dicitur: Filium suum unigenitum.
Tertia ratio est ex parte recipientis, quando ille cui datur donum, multum indiget eo. Et certe multum indigebamus tali dono, quod scilicet nos resuscitaret, quia mortui eramus: quod notatur, cum dicitur: Ut vivamus per eum.
Quarta ratio est ex parte deferentis illud donum. Aliquando enim propter gratiam personae deferentis illud donum, ut pulchrae placet puellae deferre donum. Et ita ob pulchritudinem et gratiam Virginis deferentis debet istud donum nobis esse acceptum; quod intelligitur cum dicitur: Misit Deus Filium suum. Constat enim quod misit per Virginem. Gal. 4: Misit Deus Filium suum natum de muliere.
(In I Joan., IV).
–––––––––––
Medulla S. Thomae Aquinatis per omnes anni liturgici dies distributa seu meditationes ex operibus S. Thomae depromptae. Auctore P. D. Mézard, Ordinis Praedicatorum. Tomus I. Parisiis [1906], pp. 46-48.
© Ultra montes (www.ultramontes.pl)
Cracovia MMXVI, Kraków 2016
Reditus ad indicem operis P. D. Mézard OP
POWRÓT DO STRONY GŁÓWNEJ: