MANUALE PRECUM

 

IN USUM

 

THEOLOGORUM

 

––––––––

 

Meditationes

 

––––––

 

De incarnatione

 

In incarnationis mysterio 1. Dei Filius a) Patri aequalis in maiestate, scientia, potentia – factus est homo, non angelus, immo parvulus inopsque infans; b) ut nos homines viles et ad statum bestiarum pene prolapsi – fieremus filii Dei, eius vitam participantes, similitudinem gerentes, heredes.

 

2. Dives, a) cuius est orbis et plenitudo eius, nullius egens, omnia in se habens – factus est pauper, nudus infans, pannis vestitus, in praesepi positus; b) ut nos pauperes, debitis onusti, diaboli mancipia, omni bono carentes – fieremus divites thesauro meritorum Christi, gratiae divitiis, facultate merendi.

 

3. Sanctus a) purissimus, omnibus perfectionibus plenissimus – factus est peccator quoad similitudinem, suspicionem, poenas; b) ut nos peccatores, tot tantisque facinoribus maculati – fieremus sancti, a peccatis liberi, virtutibus ornati, Dei sanctitatem adumbrantes.

 

4. Beatus, a) sibi ipse sufficiens, infinito redundans gaudio – factus est homo dolorum, a praesepi usque ad crucem eum obruentium; b) ut nos homines dolorum, tot miseriis, angoribus, passionibus pressi – fieremus beati, hic per pacem Deique dilectionem, illic per divinae beatitudinis participationem.

 

–––––––––––

 

 

Manuale Precum in usum Theologorum. CUM APPROBATIONE REV. ARCHIEP. FRIBURGENSIS. Editio tertia. Friburgi Brisgoviae. B. Herder. TYPOGRAPHUS EDITOR PONTIFICIUS. [1912], pp. 268-269.

 

© Ultra montes (www.ultramontes.pl)

Cracovia MMXVI, Kraków 2016

Reditus ad indicem:

MEDITATIONES

 

POWRÓT DO STRONY GŁÓWNEJ: