MANUALE PRECUM

 

IN USUM

 

THEOLOGORUM

 

––––––––

 

Meditationes

 

––––––

 

De tentationibus

 

Considera, quid praecipue observandum tibi sit quoad tentationes. 1. Ante tentationem. a) Noli temere in talem te praecipitare, sed quas evitare potes, fuge; memor, quam potentes sint adversarii tui (mundus, diabolus, caro), quam infirmus tu ipse, teque non posse sperare divinum auxilium, si periculis voluntarie et sine causa te exponis. b) Quoad tentationes, quas vitare nequis, noli esse timidus, pusillanimis (alioquin turbaris, non clare vides, animo destitueris faciliusque superaris), sed firmam in Domino fove fiducia. c) Semper vigila et ora.

 

2. In tentatione. a) Principiis statim obsta nec lude vel transige cum tentatione. b) Recordare praesentiae Domini earumque veritatum, quae maxime a peccando te possunt deterrere, imprimis mortis et inferni, necnon propositorum promissionumque tuarum. c) Statim et saepius divinum auxilium, suffragia B. Virginis et Angeli tutelaris implora.

 

3. Post tentationem. a) Si cecideris, noli despondere animum, sed statim surge, conterere, emendationem propone, veniam implora. b) Si victor exstiteris, gratias age, noli securum te putare, sed ad ulteriora certamina te accinge, renovando proposita, vigilantiam, orationem.

 

–––––––––––

 

 

Manuale Precum in usum Theologorum. CUM APPROBATIONE REV. ARCHIEP. FRIBURGENSIS. Editio tertia. Friburgi Brisgoviae. B. Herder. TYPOGRAPHUS EDITOR PONTIFICIUS. [1912], pp. 286-287.

 

© Ultra montes (www.ultramontes.pl)

Cracovia MMXVI, Kraków 2016

Reditus ad indicem:

MEDITATIONES

 

POWRÓT DO STRONY GŁÓWNEJ: