MANUALE PRECUM

 

IN USUM

 

THEOLOGORUM

 

––––––––

 

Meditationes

 

––––––

 

De cognitione sui ipsius

 

Considera cognitionis tui ipsius 1. necessitatem a) ad emendationem (nam si peccata non cognoscis, quomodo contritionem habebis, confiteberis, emendaberis?); b) ad peccata cavenda (quia si te non nosti, pericula et tentationes non cognosces nec vitabis nec superabis); c) ad humilitatem acquirendam; d) ad lucrandas virtutes.

 

2. Difficultatem. a) Ipsi nos decipimus (bona nostra nobis adscribimus et superaestimamus; peccata videre nolumus, excusamus; quae in aliis bene cognoscimus et vituperamus, in nobis non advertimus, ex radicibus bonis provenire putamus, immo virtutum specie supervestimus). b) Alii nos fallunt, veritatem nobis dicere verentes, adulantes. c) Satan nos decipit, interiorem statum nobis velando, laxa principia nobis suggerendo, immo quandoque bona, sed inutilia proposita in nobis excitando, quae superbiam nostram augent.

 

3. Media. a) Optimam fovere voluntatem, nos cognoscendi; b) attente legere serioque meditari verbum Dei, vitas Sanctorum; c) oratio fervens ad Spiritum Sanctum; d) ad nos ipsos, inclinationes, motus primo-primos, affectus attendere; e) conscientiam quotidie examinare; f) bonos confratres rogare, ut ipsi nos moneant; vituperationem libenter accipere proque ea gratias agere; g) saepe sacerdoti vere religioso et prudenti confiteri.

 

–––––––––––

 

 

Manuale Precum in usum Theologorum. CUM APPROBATIONE REV. ARCHIEP. FRIBURGENSIS. Editio tertia. Friburgi Brisgoviae. B. Herder. TYPOGRAPHUS EDITOR PONTIFICIUS. [1912], pp. 284-285.

 

© Ultra montes (www.ultramontes.pl)

Cracovia MMXVI, Kraków 2016

Reditus ad indicem:

MEDITATIONES

 

POWRÓT DO STRONY GŁÓWNEJ: