MANUALE PRECUM
IN USUM
THEOLOGORUM
––––––––
Meditationes
––––––
De sanctissimo Corde Iesu
Cor Iesu in ss. Sacramento est 1. obiectum dignissimum amoris et gaudii nostri, siquidem oceanus est omnis pulchritudinis et bonitatis, fornax ardentissimae erga nos caritatis, thesaurus omnium bonorum, quae nos hic et illic possunt beatificare. Quare hoc cor divinum tenerrimo prosequamur amore, perpetua gratitudine et in eo gaudium consolationemque quaeramus.
2. Speculum et exemplar cunctarum virtutum, imprimis puritatis, caritatis, mansuetudinis, humilitatis, zeli (quas singulas percurrens considera, quam praeclare cor Iesu eas exercuerit in vita sua mortali et quomodo adhuc resplendeant in vita sua sacramentali). Quare illud saepe meditando suspiciamus, cor nostrum cum eo comparemus, imitando ei assimilari satagamus.
3. Fons omnium gratiarum, purgantium a peccatis malisque inclinationibus, confortantium contra tentationes et ad pugnas et labores, unientium cum hoc divino corde et eius intentionibus. Quare hunc fontem ardenter sitiamus, eum saepe requiramus, avide ex illo hauriamus.
–––––––––––
Manuale Precum in usum Theologorum. CUM APPROBATIONE REV. ARCHIEP. FRIBURGENSIS. Editio tertia. Friburgi Brisgoviae. B. Herder. TYPOGRAPHUS EDITOR PONTIFICIUS. [1912], pp. 278-279.
© Ultra montes (www.ultramontes.pl)
Cracovia MMXVI, Kraków 2016
POWRÓT DO STRONY GŁÓWNEJ: