––––––––
––––––
Iesus in cruce exaltatus
Christus in cruce est exaltatus: 1. ut medius inter coelum terramque hanc illi reconciliaret (luens avaritiam nostram per extremam paupertatem, voluptates per acerbissimos dolores, superbiam per profundissimam humiliationem, inoboedientiam per perfectissimam oboedientiam);
2. ut expansis bracchiis omnes traheret ad se ipsum (dum, considerantes ineffabiles, quos pro nobis ex purissima, gratuitissima ac prorsus immensa caritate pertulit, labores et dolores, per fidem firmam ei appropinquamus, per spem confidenter ad eum confugimus, per gratitudinem, caritatem et in passionibus consociationem intime ei coniungimur);
3. ut et nos, calcantes terrena, ad coelum elevemur (per Christi crucifixi frequentem recordationem, meditationem et imitationem; per divitiarum, honorum, voluptatum contemptum; per bonorum coelestium desiderium; per intentionem et vitam in coelum semper directam).
–––––––––––
Manuale Precum in usum Theologorum. CUM APPROBATIONE REV. ARCHIEP. FRIBURGENSIS. Editio tertia. Friburgi Brisgoviae. B. Herder. TYPOGRAPHUS EDITOR PONTIFICIUS. [1912], pp. 275-276.
© Ultra montes (www.ultramontes.pl)
Cracovia MMXVI, Kraków 2016
POWRÓT DO STRONY GŁÓWNEJ: