COMPENDIUM

THEOLOGIAE DOGMATICAE GENERALIS

P. PARTHENIUS MINGES OFM

DOCTOR SS. THEOL. ET PHILOS.

––––––––––

PARS IV.

De religione et ecclesia catholica

–––––––––

CAPUT I.

De institutione, membris et proprietatibus ecclesiae

––––––––

Ecclesia est infallibilis

Infallibilitas est duplex, scil. activa et passiva. Activa est infallibilitas praedicationis ecclesiae seu ecclesiae docentis; passiva est infallibilitas fidei seu ecclesiae discentis; ex infallibilitate activa sequitur passiva. De infallibilitate passiva nunc agimus. Haec dicit: ecclesia semper custodit fideliter ab errore immunem ambitum totum doctrinae revelatae et divinitus sibi traditae. Hoc patet:

1. ex indefectibilitate ecclesiae. – Doctrina revelata seu depositum fidei est lex, cui innititur religio christiana; quae si errore inficitur, ecclesia eo ipso essentialiter mutatur, non habet veram doctrinam, non iam est ecclesia Christi nec religio vera.

2. ex fine ecclesiae. – Ecclesia omnes homines ad veritatem et viam salutis et vitam aeternam ducere debet, quare parvulis suis panem poscentibus scorpionem dare nequit; secus esset non mater fidelium, sed eos interitui exponeret.

3. ex revelatione. – 1 Tim 3, 15 dicitur ecclesia "columna et firmamentum veritatis". S. Augustinus: (1) "Ecclesia catholica contra omnes haereses pugnans pugnare potest, expugnari tamen non potest. Haereses omnes de illa exierunt tamquam sarmenta inutilia de vite praecisa: ipsa autem manet in radice sua, in vite sua, in caritate sua. Portae inferorum non vincent eam".

–––––––––––

Compendium theologiae dogmaticae generalis. Auctore P. Parthenio Minges O. F. M. DOCTORE SS. THEOL. ET PHILOS. ALUMNO PROVINCIAE BAVARICAE. Editio secunda emendata et augmenta. Ratisbonae 1923, p. 180 (n. 278).

Notae:

(1) De symbolo serm. ad catech. 6, 14; M. 40, 635.

--------------------------------------------------------------------------------------------------------------------------------------------------------------

Nihil obstat.

R o m a e , die 2. Februarii 1922.

Fr. M. Albertus O'Neill O. F. M.

–––––––––

Imprimi potest, servatis servandis.

R o m a e , die 11. Februarii 1922.

Fr. Bernardinus Klumper O. F. M.,

Min. Glis.

–––––––––

Imprimatur.

M o n a c h i i , die 11. Februarii 1923.

Dr. M. Buchberger,

Vic. Gen.

--------------------------------------------------------------------------------------------------------------------------------------------------------------

POWRÓT DO STRONY GŁÓWNEJ: