DIARIUM SANCTORUM

 

R. P. JOANNES STEPHANUS GROSEZ SI

 

––––––––––

 

S. Vincentius Ferrerius

 

V. Aprilis

 

Castigo corpus meum, et in servitutem redigo, ne, cum aliis praedicavero, ipse reprobus efficiar. Paulus ad Cor. 9.

 

S. Vincentius Ferrerius ordinis S. Dominici suis concionibus innumeros judaeos, infideles, et degeneres christianos, ad veram Christi fidem, rectamque vivendi rationem reduxit. Solitus erat poenitentiam, passionem JESU Christi, infernum, tam appositis, tam vehementibus verbis auditorum suorum auribus inculcare, ut fleret ipse, auditores vero manantibus lacrymis propalam peccata confiterentur. Obiit anno 1419.

 

Meditatio de apparatu supremi judicii

 

1. Terribilis erit ultimi judicii apparatus, horrenda videbuntur signa, sol cruentus, aër igneus, vehementioribus procellis agitatum mare, terrae motus, fames, sterilitas, bella, morbi. Ad haec tam callide fideles exagitabit Anti-Christus, vix ut ipsi possint resistere. Credo Domine, me auditurum esse terrificas tubas vocantes ad judicium. Si quando senseris, ad aliquod crimen te cieri, in mentem revoca; nulli tolerabile Christi judicium. Basil.

 

2. Cerne animo vallem Josaphat, variis refertam populis. JESUS de coelo descendet, copiosa beatorum corona stipatus, ut omnes homines judicet: ad ejus dextram boni angeli, et electi omnes, ad sinistram vero damnati, longa daemonum caterva circumsepti. Heu! aliquando ero in hac valle lacrymarum. Quid de me tunc fiet? nescio: attamen hilarem vitam ago, quamvis ignorem, an ad dexteram, an ad sinistram sim collocandus?

 

3. Considera, quid tunc dicturi, quid cogitaturi sint electi. An eos poenitebit, mundi vanitatem contempsisse? Attende etiam ad ea, quae dicturi sunt damnati; en, inquient (electos indicantes) en! quos aliquando habuimus in derisum: quam tamen prudentes fuerunt! ipsis vero damnatis quam lugubre erit, DEUM videre, et ante pretii sui perire conspectum. Eucher.

 

–––––––––––

 

 

Diarium Sanctorum a Reverendo Patre Joanne Stephano Grosez e Societate Jesu conscriptum. Trimestre secundum. Tyrnaviae. Typis Collegii Academici Societ. Jesu, Anno M. DCC. LXXI. (1771), pp. 11-12.

 
© Ultra montes (www.ultramontes.pl)
Cracovia MMVII, Kraków 2007

POWRÓT DO STRONY GŁÓWNEJ: