Quod humilibus insistendum est operibus, cum deficitur a summis. – De Imitatione Christi. III. 51. Thomas a Kempis.

THOMAE A KEMPIS

DE IMITATIONE CHRISTI

LIBRI QUATUOR

TEXTUM EDIDIT,

CONSIDERATIONES

AD CUIUSQUE LIBRI SINGULA CAPITA EX CETERIS EIUSDEM

THOMAE A KEMPIS OPUSCULIS COLLEGIT ET ADIECIT

HERMANNUS GERLACH

––––––––

LIBER III.

DE INTERNA CONSOLATIONE

–––––

CAPUT LI.

Quod humilibus insistendum est operibus, cum deficitur a summis

1. Fili, non vales semper in ferventiori desiderio virtutum stare, nec in altiori gradu contemplationis consistere: sed necesse habes interdum ob originalem corruptelam ad inferiora descendere, et onus corruptibilis vitae etiam invite et cum taedio portare. Quamdiu mortale corpus geris, taedium senties et gravamen cordis. Oportet ergo saepe in carne de carnis onere gemere, eo quod non vales spiritualibus studiis et divinae contemplationi indesinenter inhaerere.

2. Tunc expedit tibi ad humilia et exteriora opera confugere, et in bonis actibus te recreare, adventum meum et supernam visitationem firma confidentia expectare, exilium tuum et ariditatem mentis patienter sufferre, donec iterum a me visiteris et ab omnibus anxietatibus libereris. Nam faciam te laborum oblivisci et interna quiete perfrui. Expandam coram te prata scripturarum, ut, dilatato corde, currere incipias viam mandatorum meorum. Et dices: Non sunt condignae passiones huius temporis ad futuram gloriam, quae revelabitur in nobis.

Consideratio

Si graviora non potes agere: fac libentissime parva (1). Si non potes cum Iohanne Evangelista sublimia et divina contemplari, procide cum Maria Magdalena ad pedes Iesu, humiliter veniam petendo et pro peccatis lacrimando, ut dimittantur tibi etiam peccata multa, quibus Deum saepe offendisti. Si non vales cum sancto Paulo ad tertium caelum evolare, maneas cum eo apud Iesum crucifixum, non in carne gloriando, sed carnem cum vitiis et concupiscentiis suis crucifigendo. Si non habes alas aquilae volantis ad caeli sidera, habeas pennas simplicis columbae nidificantis in petra, meditando cotidie sacrosancta Iesu vulnera (2).

Maneas in silentio et cogita de Deo pro solacio habendo, et liberaberis de taedio boni operis, te perseverante in bono incepto (3). Omne opus bonum in Deo factum gratiam maiorem meretur, laetificat mentem et delectat operantem (4).

O quam magnam dat fideli servo fiduciam nunc in tempore isto et dabit maiorem in extremo examine sermo Domini, quem locutus est, dicens: «Euge, serve bone et fidelis, quia in modico fuisti fidelis, intra in gaudium Domini tui» (Mt 25, 23). Pius Dominus, qui remunerare semper solet famulantes sibi, non idcirco denegabit tibi abscondita dulcedinis suae, quia te promptum externis et servilibus operibus mancipasti (5).

––––––––––––

Thomae a Kempis De imitatione Christi libri quatuor. Textum edidit, Considerationes ad cuiusque libri singula capita ex ceteris eiusdem Thomae a Kempis opusculis collegit et adiecit Hermannus Gerlach. Editio tertia aucta et emendata. CUM APPROBATIONE REV. ARCHIEP. FRIBURGENSIS. Friburgi Brisgoviae. SUMPTIBUS HERDER, TYPOGRAPHI EDITORIS PONTIFICII. [1909], pp. 379-381.

Notae:

(1) Libellus spiritualis exercitii c. 7, P. 2, p. 345, l. 7.

(2) Sermo 28 ad fratres, n. 8.

(3) Hortulus rosarum c. 14, n. 1.

(4) Epistula 6, n. 5.

(5) De fideli dispensatore c. 3, § 9.

Cracovia MMXV, Kraków 2015

Reditus ad indicem
DE IMITATIONE CHRISTI

POWRÓT DO STRONY GŁÓWNEJ: