Qualiter instante tribulatione Deus invocandus est et benedicendus.

THOMAE A KEMPIS

DE IMITATIONE CHRISTI

LIBRI QUATUOR

TEXTUM EDIDIT,

CONSIDERATIONES

AD CUIUSQUE LIBRI SINGULA CAPITA EX CETERIS EIUSDEM

THOMAE A KEMPIS OPUSCULIS COLLEGIT ET ADIECIT

HERMANNUS GERLACH

––––––––

LIBER III.

DE INTERNA CONSOLATIONE

–––––

CAPUT XXIX.

Qualiter instante tribulatione Deus invocandus est et benedicendus

1. Sit nomen tuum, Domine, benedictum in saecula, qui voluisti hanc temptationem et tribulationem venire super me. Non possum eam effugere, sed necesse habeo ad te confugere, ut me adiuves et in bonum mihi convertas. Domine, modo sum in tribulatione, et non est cordi meo bene, sed multum vexor a praesenti passione. Et nunc, pater dilecte, quid dicam? Deprehensus sum inter angustias. Salvifica me ex hora hac. Sed propterea veni in hanc horam, ut tu clarificeris, cum fuero valide humiliatus et per te liberatus. Complaceat tibi, Domine, ut eruas me: nam ego pauper quid agere possum, et quo ibo sine te? Da patientiam, Domine, etiam hac vice. Adiuva me, Deus meus, et non timebo, quantumcumque gravatus fuero.

2. Et nunc inter haec quid dicam? Domine, fiat voluntas tua. Ego bene merui tribulari et gravari. Oportet utique, ut sustineam, et utinam patienter, donec transeat tempestas et melius fiat! Potens est autem omnipotens manus tua, etiam hanc temptationem a me auferre et eius impetum mitigare, ne penitus succumbam, quemadmodum et prius saepius egisti mecum, Deus meus, misericordia mea. Et quanto mihi difficilius, tanto tibi facilior est haec mutatio dexterae excelsi.

Consideratio

Disce Dominum laudare in tribulatione quam pateris: et fac de necessitate virtutem; ut meritum tuum augescat: et poena minuatur peccatorum. Vis murmurare contra Deum; quia te flagellat et probat? Hoc tibi non expedit: sed magis ora ut malis tuis non parcat. Confitere ergo Domino quia bonus in donis suis: confitere etiam, quia iustus in flagellis tuis. Bonitas sua sine meritis tuis contulit tibi bona; iniquitas autem tua quid meruit nisi flagella? Dic igitur ei in oratione prostratus. Domine Deus, ego nil aliud ex me promerui, quam pati et flagellari; nec dignus sum vel minimam a te consolationem recipere: quoniam in multis te offendi. Sis igitur in omnibus benedictus: in quibus me affligis et uris. Si minus est: addes amplius. Modicum est totum secundum quod merui. Afflictio mea, laus tua sit et gloria. Gloriari enim me oportet hoc modo in cruce Domini mei Iesu Christi. Duret et valeat dolor meus: quantum tibi placuerit. Laudem tuam imple in me: scio enim quod nihil iniuste agere potes (1).

Da patientiam pie Domine, et sit mihi omnis tribulatio et angustia super omnem consolationem desiderabilis et beneventa (2). Confirma me in verbis tuis, ne deficiam in via. Redde mihi laetitiam salutaris tui (3). Potens es, omnipotens et misericors Domine, qui me de nihilo creasti quique hominis infirmitatem et casum ab initio praenosti, omnia commissa mea benignissime dimittere ac instaurare omissa, perdita restituere, livida curare ac totum statum mentis meae in melius commutare, ita ut iam nil desit de priori proposito, sed etiam omnis occasio mali cooperetur mihi in melius, tibi humiliter prostrato. Haec est mutatio dexterae excelsi, haec est visitatio caelestis, haec est multiplex collatio divinae pietatis (4).

––––––––––––

Thomae a Kempis De imitatione Christi libri quatuor. Textum edidit, Considerationes ad cuiusque libri singula capita ex ceteris eiusdem Thomae a Kempis opusculis collegit et adiecit Hermannus Gerlach. Editio tertia aucta et emendata. CUM APPROBATIONE REV. ARCHIEP. FRIBURGENSIS. Friburgi Brisgoviae. SUMPTIBUS HERDER, TYPOGRAPHI EDITORIS PONTIFICII. [1909], pp. 294-297.

Notae:

(1) De recognitione propriae fragilitatis c. 7, P. 2, p. 369 sq, l. 10.

(2) De elevatione mentis P. 2, p. 417 sq, l. 29.

(3) Hospitale pauperum c. 18, n. 2, 1.

(4) Soliloquium animae c. 25, n. 11.

Cracovia MMXIII, Kraków 2013

Reditus ad indicem
DE IMITATIONE CHRISTI

POWRÓT DO STRONY GŁÓWNEJ: