De Imitatione Christi. – I. 5. De lectione Sanctarum Scripturarum.

THOMAE A KEMPIS

DE IMITATIONE CHRISTI

LIBRI QUATUOR

TEXTUM EDIDIT,

C O N S I D E R A T I O N E S

AD CUIUSQUE LIBRI SINGULA CAPITA EX CETERIS EIUSDEM

THOMAE A KEMPIS OPUSCULIS COLLEGIT ET ADIECIT

HERMANNUS GERLACH

––––––––

LIBER I.

ADMONITIONES AD SPIRITUALEM VITAM UTILES

–––––

CAPUT V.

De lectione Sanctarum Scripturarum

1. Veritas est in Scripturis Sanctis quaerenda, non eloquentia. Omnis Scriptura Sacra eo spiritu debet legi, quo facta est. Quaerere potius debemus utilitatem in Scripturis, quam subtilitatem sermonis. Ita libenter devotos et simplices libros legere debemus, sicut altos et profundos. Non te offendat auctoritas scribentis, utrum parvae vel magnae litteraturae fuerit; sed amor purae veritatis te trahat ad legendum. Non quaeras, quis hoc dixerit; sed quid dicatur, attende.

2. Homines transeunt, sed veritas Domini manet in aeternum. Sine personarum acceptione, variis modis loquitur nobis Deus. Curiositas nostra saepe nos impedit in lectione Scripturarum, cum volumus intellegere et discutere, ubi simpliciter esset transeundum. Si vis profectum haurire, lege humiliter, simpliciter et fideliter; nec umquam velis habere nomen scientiae. Interroga libenter et audi tacens verba sanctorum; nec displiceant tibi parabolae seniorum: sine causa enim non proferuntur.

Consideratio

Quaecumque in lege vetere et nova scripta sunt, ad doctrinam animae nostrae scripta sunt, ut Deo fideliter serviamus, odiendo malum et adhaerendo Deo, summo bono, corde puro, integro et perfecto, hic et in futuro (1). Verbum Dei et doctrina Christi lumen vitae, salus mundi, porta caeli, cibus animae, iucunditas cordis Deum super omnia amantis (2). Quanto saepius quis evangelica verba audierit et legerit: atque attentius cogitaverit et ruminaverit; tanto in virtutibus plus proficiet: et domus animae suae firmius stabit pulchriusque fulgebit (3). Nam hominis verbum transit; verbum autem Dei aeternum et immutabile manet (4).

Veritas non est aspernanda, a quocumque simplici proferatur. Stude primo humiliter discere et parva implere, et Deus dabit tibi maiora, si utile fuerit, citius intellegere. Qui multa scit et legit: si non facit, quae novit et didicit, vacuus et famelicus de bona mensa recedit (5).

Pauper quaedam muliercula diligens quae Dei sunt, frequenter ecclesiam visitabat: et verbum Dei libenter praedicare audiebat. Quadam ergo vice de ecclesia veniens interrogata est: quid boni de sermone retinuisset. Quae breviter respondens ait. Nescio vobis multa dicere: sed hoc bene audivi et retinui, quod de cetero nolo peccare. Bene et prudenter respondit: quae fructum boni sermonis secum portavit, ne amplius peccaret. Unde Salvator noster in evangelio devotae mulieri ait. Beati qui audiunt verbum Dei: et custodiunt illud (6).

––––––––––––

Thomae a Kempis De imitatione Christi libri quatuor. Textum edidit, Considerationes ad cuiusque libri singula capita ex ceteris eiusdem Thomae a Kempis opusculis collegit et adiecit Hermannus Gerlach. Editio tertia aucta et emendata. CUM APPROBATIONE REV. ARCHIEP. FRIBURGENSIS. Friburgi Brisgoviae. SUMPTIBUS HERDER, TYPOGRAPHI EDITORIS PONTIFICII. [1909], pp. 17-19.

Notae:

(1) Vallis liliorum c. 21, n. 1.

(2) Doctrinale iuvenum c. 1, n. 1.

(3) Sermones ad novicios 30, P. 6, p. 300, l. 24.

(4) De elevatione mentis P. 2, p. 405, l. 7.

(5) Hortulus rosarum c. 6, n. 1; c. 12, n. 5.

(6) Sermones ad novicios 30, P. 6, p. 314, l. 11.

Reditus ad indicem
DE IMITATIONE CHRISTI

POWRÓT DO STRONY GŁÓWNEJ: