CATECHISMUS

AD USUM SEMINARIORUM

AUCTORE

P. L. DANES

––––––––––

EPISTOLA

VENERANDAM FACULTATEM ARTIUM

ACADEMIAE LOVANIENSIS.

––––

VENERANDE DOMINE DECANE, CAETERIQUE VV. DD. COLLEGAE.

Cum deessent exemplaria catechismi ad usum studiosae juventutis vestrae destinati, judicastis expedire, ut pro nova editione prolixior alius nova methodo concinnaretur: eam mihi provinciam demandastis; obedivi, suscepi, et quantum vires Deo juvante tulerunt, implevi. At ne quid fortasse novitatis inveherem, celebrioris nominis catechismos veteres ac recentiores, vel totos vel ex parte evolvi, et ex iis plena cum libertate decerpsi quidquid fidei catholicae explicandae ac stabiliendae, moribusque christianis salubriter instituendis judicavi fore opportunum. Ob necessariam interim brevitatem multa sciens praetermisi, aut verbo tantum indicavi, reservans solertiae explicantium pleniorem omnium elucidationem. Quam rem his ipsis utcumque faciliorem reddere conatus sum, indicatis plerumque SS. Litterarum, sanctorumque Patrum locis praecipuis, e quibus uberior probatio et illustratio petenda sit. Aliud praeterea adjumentum praebet ipsa opusculi divisio; nempe in tot capita distributum est, quot fere spatio biennii occurrere solent lectiones catechisticae: adeo ut si singulis vicibus unum circiter caput explanetur, cum cursu philosophico catechismi explicatio absolvenda sit. Accipite ergo bonique consulite conatum hunc meum, quem imperastis: faxitque Deus ut qui unice prae oculis habendus est juventutis profectus, cum uberi Christianae pietatis incremento ex eo promanet, vosque primi illius auctores fulgeatis olim velut stellae in perpetuas aeternitates. Ita voveo.

Venerande Domine Decane, caeterique VV. DD. Collegae,

D. D. VV.

Humillimus et obsequentissimus famulus

P. L. DANES, S. T. L. PHILOSOPHIAE

PROFESSOR IN LILIO.

LOVANII 22 AUG. 1713.

–––––––––––

Institutiones Doctrinae Christianae, sive Catechismus ad usum seminariorum. Auctore P. L. Danes. Editio nova, caeteris correctior. Mechliniae, P. J. HANICQ, TYPORGR. ARCHIEP. MECHL. CUM APPROBATIONE. 1839, pp. 5-6.

Cracovia MMXV, Kraków 2015

Reditus ad indicem operis Sac. Petri Ludovici Danes

Institutiones Doctrinae Christianae

sive

Catechismus nova methodo concinnatus

POWRÓT DO STRONY GŁÓWNEJ: