INSTITUTIONES

DOCTRINAE

CHRISTIANAE,

SIVE

CATECHISMUS

AD USUM SEMINARIORUM

AUCTORE

P. L. DANES

––––––––––

PARS PRIMA.

DE FIDE ET SYMBOLO; ITEM DE SACRAMENTIS ET CAEREMONIIS ECCLESIAE

–––––––––

SECTIO PRIMA.

DE FIDE ET SYMBOLO

–––––––

CAPUT IX

Religionis series a MOSE usque ad DAVIDEM

––––

QUAESTIO 1. Quid post Josephi mortem Israëlitis in Ægypto accidit?

R. Multis annis durissima servitute pressi, per Mosem tandem ex ea educti sunt.

Q. 2. Recense in compendio seriem gestorum Mosis.

R. Ne populus Israëliticus in immensum cresceret, omnes Hebraeorum masculos mox ut nati essent, in flumen praecipitari jusserat Pharao (1), novus post Josephi mortem rex Ægypti, Israëlitarum hostis atrocissimus.

Hoc persecutionis tempore (2) natus MOSES, postquam trimestri spatio metu regis absconditus fuerat, aquis Nili exponitur; inde a Pharaonis filia ereptus, suae matri educandus traditur. Ab illa deinde adoptatus, (3) omni disciplinarum et scientiarum genere in Ægypto instruitur. (4) Quadraginta anno natus, populares suos vindicare coepit, percusso Ægyptio qui Hebraeo cuidam inferebat injuriam.

Ob Pharaonis iram profugus in Madianitidem Arabiae regionem, (5) elapsis aliis 40 annis, cum pasceret oves Jethro soceri sui, a Deo (6) in rubo ardenti et incombusto sibi loquente, in Ægyptum missus est, ut Israëlitas ab Ægyptiorum servitute liberaret adjuncto illi legationis comite fratre Aarone.

Post varias, propter obduratum regis animum, (7) Ægypti plagas, omnesque praesertim primogenitos, unius noctis spatio repentina morte sublatos Israëlitae ab Ægyptiis, qui hucusque obstiterant, exire compulsi, (8) per mare rubrum sicco vestigio transierunt, in quo Ægyptii persequentes omnes cum Pharaone submersi sunt.

Q. 3. Numquid ejusdem MOSIS ministerio Israëlitae LEGEM acceperunt?

R. Ita; veterem scilicet illam, totamque (9) praefigurativam, quae sacrificiis caeremoniisque suis omnibus praenuntiabat praestantiorem aliam sibi successuram, ac praesertim illius auctorem, Mediatorem Dei et hominum CHRISTUM JESUM.

Hac porro ratione data est. Quinquagesimo die ab exitu ex Ægypto, e monte Sinai, inter fulgura ac tonitrua, et horrificum buccinae sonitum, (10) decalogum Deus universo populo promulgavit, et, in duabus tabulis lapideis descriptum, Mosi tradidit. (11) Has cum Moses propter flagitium populi, vitulum aureum adorantis, confregisset, (12) novas deinde a Deo accepit in arca foederis perpetuo asservandas.

Praeter has leges morales, aliae quoque adjunctae sunt, tum quae ad sacrificia divinique cultus caeremonias, tum quae ad exercenda judicia, justitiamque administrandam pertinerent.

Q. 4. Cuinam familiae sacerdotium dari voluit Deus?

R. Familiae AARONIS fratris Mosis. Caeteri de Tribu LEVI, inferioribus altaris ministeriis deputati sunt. Caeterum qui contra hanc Dei (13) vocationem sacerdotium sibi vindicare conati sunt, CORE, DATHAN et ABIRON cum asseclis suis, partim dehiscente terra, partim incendio perierunt.

Q. 5. Quanto tempore in deserto commorati sunt Israëlitae?

R. 40 annis, quo toto tempore datus est illis de coelo cibus qui (14) MANNA dictus fuit. Ex sexcentis autem virorum millibus (tot enim praeter mulieres et parvulos ex Ægypto egressi sunt) nullus in TERRAM PROMISSAM Chanaan ingressus est, praeter CALEB et JOSUE. Caeteri omnes in deserto mortui sunt, quorum alii propter incredulitatem, frequentesque contra Deum et Mosem murmurationes terra absorpti, alii gladio percussi, alii igne, alii ab ignitis serpentibus perierunt.

In hujus ultimi mali remedium (15) SERPENS AENEUS erigi jussus, ut qui eum aspicerent, a serpentum morsibus sanarentur, expressissima fuit CHRISTI CRUCIFIXI figura.

Q. 6. Quis Israëlitas in terram promissionis induxit?

R. JOSUE, (16) qui Mose mortuo dux populi factus est; hic nomine et rebus gestis typus Christi Salvatoris, obsistentes populos Chananaeos maxima ex parte vicit, subjugavit, et delevit, eorumque regiones 12 tribubus Israël possidendas, sorte divisit.

Q. 7. Quid post mortem Josuë contigit?

R. (17) Populus identidem a Dei obsequio ad idola delapsus, variisque modis a vicinis populis vexatus et oppressus, dignissimas perfidiae suae poenas dabat. Rediens autem ad poenitentiam et fidelem Dei cultum, identidem etiam liberabatur, per homines singulariter plerumque a Deo suscitatos, quorum in libro Judicum res gestae recitantur. Ita nempe in populo isto stabile edebatur exemplum divinae providentiae piorum benefacta remunerantis, atque impiorum scelera vindicantis.

Inter JUDICES celeberrimi sunt GEDEON, JEPHTE, SAMSON, HELI et SAMUEL, qui eorum fuit ultimus.

Q. 8. Quo ergo regiminis genere usi sunt post SAMUELEM Israëlitae?

R. In morem caeterarum gentium (18) (cum Deum solum haberent super se regnantem) regem sibi dari poposcerunt a Samuële. (19) Rex iis datus est SAUL, de Tribu Benjamin, quem Deus elegit, Samuël unxit, et sors populo declaravit. Hic quidem initio Deo gratus, (20) sed inobedientiae merito postmodum rejectus fuit, ita ut potestas regia ad aliam deinceps familiam Tribumque transierit.

–––––––––––

Institutiones Doctrinae Christianae, sive Catechismus ad usum seminariorum. Auctore P. L. Danes. Editio nova, caeteris correctior. Mechliniae, P. J. HANICQ, TYPORGR. ARCHIEP. MECHL. CUM APPROBATIONE. 1839, pp. 32-34.

Notae:

(1) Exod. I, 22.

(2) Ibid., II.

(3) Act. VII, 22.

(4) Ibid., 23.

(5) Act. VII, 30.

(6) Exod. III et VI.

(7) Ibid., VII-XII.

(8) Exod. XIV.

(9) 1 Cor. X, 11.

(10) Exod. XX.

(11) Ibid., XXXII.

(12) Exod. XXXIV.

(13) Num. XVI. Hebr. V, 4.

(14) Exod. XVI, 14. Num. XI, 7. Sap. XVI, 20.

(15) Num. XXI, 8. Joan. III, 14.

(16) Vide librum Josuë.

(17) Vide librum Judicum.

(18) 1 Reg. VIII.

(19) Ibid., X.

(20) Ibid., XV et XVI.

Cracovia MMXV, Kraków 2015

Reditus ad indicem operis Sac. Petri Ludovici Danes

Institutiones Doctrinae Christianae

sive

Catechismus nova methodo concinnatus

POWRÓT DO STRONY GŁÓWNEJ: