CATECHISMUS

AD USUM SEMINARIORUM

AUCTORE

P. L. DANES

––––––––––

PARS PRIMA.

DE FIDE ET SYMBOLO; ITEM DE SACRAMENTIS ET CAEREMONIIS ECCLESIAE

–––––––––

SECTIO PRIMA.

DE FIDE ET SYMBOLO

–––––––

CAPUT III

De vitiis Fidei oppositis

––––

QUAESTIO 1. Quot modis contra fidem peccari potest?

R. Duobus, ut contra virtutes reliquas.

Omissione contra praeceptum fidei affirmativum, et commissione contra negativum.

Praecepto fidei affirmativo (ut vocant) jubemur actum fidei tam frequenter elicere, ut ex fide vivere censeri possimus: jubemur etiam fidem, quam corde credimus palam confiteri, quando id Dei honor, proximive utilitas exigit. Exigit autem, quando quispiam, quam religionem sectetur, per potestatem publicam interrogatur: ne alioquin si subterfugiat, Christum erubescere censeatur.

Praecepto fidei negativo prohibemur aliquid a fide christiana et catholica alienum credere vel profiteri. Peccatum huic praecepto contrarium infidelitas nominatur.

Q. 2. Quot sunt celebriores infidelitatis species?

R. Tres, paganismus, judaïsmus et haeresis.

Paganismus omnes Gentilium, Idololatrarum et Mahometanorum religiones complectitur.

Judaïsmus religio est eorum, qui quem nos indubitata fide advenisse credimus Christum Redemptorem, quasi adhuc venturum cum splendore et majestate saeculari, mira pertinacia exspectant. Populus quondam a Deo electus, nunc post Messiam a se rejectum sine rege, sine principe, sine sacrificio, sine altari dispersus toto orbe vagatur, demum in fine saeculi deposita cordis caecitate, ad Christum convertendus.

Haeresis est vitium fidei oppositum, quo quis fidem in baptismo professus, aliquid a communi Ecclesiae catholicae doctrina alienum sibi tuendum eligit, eique pertinaciter adhaeret.

Haereticus igitur ille dicitur qui, baptismo suscepto, errorem aliquem catholicae fidei contrarium sustinet, idque cum pertinacia.

Q. 3. Fuitne semper Ecclesiae fides per haereses oppugnata?

R. Fuit jam inde a temporibus Apostolorum ac deinceps omni saeculo, eritque usque ad mundi finem: nam teste Apostolo (1) oportet et haereses esse, id est attenta multorum superbia et quae inde nascitur pertinacia, fieri aliter non potest, quin in doctrina fidei oriantur dissentiones.

Q. 4. Quid de variis istis haeresibus factum est?

R. Vidit eas Ecclesia pene omnes oriri et occidere: ubi ipsa fundata supra petram contra ventos omnes et procellas persistit immobilis, certa Christi promissione secura, ut aliquando et hodiernae haereses caeterarum more dissipentur. Portae namque inferi, id est omnes inferni potestates, non praevalebunt adversus eam (2).

Q. 5. Quid ex iisdem haeresibus damni, quid utilitatis tulit Ecclesia?

R. Multi quidem ejus filii, sed pravi et instabiles, a veritate exciderunt: verum hoc inde lucri percepit, quod qui in veritate catholica firmi essent (3) manifesti fierent, et crescente pastorum vigilantia, veritas christianae fidei majorem lucem acciperet, moresque fidelium majorem puritatem. Sic (4) utique omnipotens Deus ex iis, quae sinit, malis, majora bona elicit, et diligentibus se (5) omnia cooperari facit in bonum.

Q. 6. Estne singularis Dei favor in fide catholica natum et educatum esse?

R. Est sane tantus ut numquam satis aestimari possit. Tristis utique experientia satis probat, quam raro et quam difficile qui in infidelitate nati et educati sunt, ad veram fidem (citra quam non est salus) convertantur. Indesinenti ergo gratitudine, tam ingenti, tamque gratuito Dei beneficio respondendum est, praesertim vita, fide nostra et Deo digna.

–––––––––––

Institutiones Doctrinae Christianae, sive Catechismus ad usum seminariorum. Auctore P. L. Danes. Editio nova, caeteris correctior. Mechliniae, P. J. HANICQ, TYPORGR. ARCHIEP. MECHL. CUM APPROBATIONE. 1839, pp. 16-18.

Notae:

(1) I Cor. XI, 19.

(2) Matth. XVI, 18.

(3) I Cor. XI, 19.

(4) S. Aug. Enchirid.

(5) Rom. VIII, 28.

Cracovia MMXV, Kraków 2015

Reditus ad indicem operis Sac. Petri Ludovici Danes

Institutiones Doctrinae Christianae

sive

Catechismus nova methodo concinnatus

POWRÓT DO STRONY GŁÓWNEJ: