MEDITATIONES VITAE CHRISTI
S. R. E. CARDINALIS
S. BONAVENTURA
EX ORDINE MINORUM
EPISCOPUS ALBANENSIS, DOCTOR ECCLESIAE SERAPHICUS
CAPUT PRIMUM
De sollicita pro nobis intercessione angelorum
Cum per longissima tempora ultra spatium quinque millium
annorum miserabiliter jaceret genus humanum, et nullus propter peccatum
primi hominis ascendere posset ad patriam beatissimi angelici spiritus,
compatientes tantae ruinae et de sua restauratione solliciti, licet etiam
pluries, primo tamen adveniente plenitudine temporis, devotius et instantius
taliter supplicaverunt Domino procidentes in facies suas ante thronum ejus
simul omnes congregati, et dixerunt: Domine, placuit majestati vestrae,
et rationalem creaturam, scilicet hominem, creare propter vestram bonitatem,
ut ipse esset hic nobiscum, et ut nobis ex ipso nostrarum contingeret restauratio
ruinarum. Sed ecce pereunt omnes, et nemo salvatur, et in tot annorum curriculis
hoc videmus, quod de omnibus hostes nostri triumphant, et de ipsis non
nostrae ruinae, sed tartareae speluncae replentur. Ut quid ergo, Domine,
nascuntur? Quare traduntur bestiis animae confitentes tibi? Et si secundum
justitiam vestram hoc fiat, tamen misericordiae tempus est. Et si primi
parentes vestrum mandatum incaute transgressi sunt, subveniat misericordia
vestra. Mementote, quod ad similitudinem vestram creastis eos. Aperite,
Domine, misericorditer manum vestram, et implete misericorditer. Oculi
omnium spectant ad vos, sicut oculi servorum ad manus dominorum suorum,
donec misereamini et subveniatis remedio salutari humano generi.
S. R. E. Cardinalis S. Bonaventurae ex Ordine Minorum Episcopi Albanensis, Doctoris Ecclesiae Seraphici Opera omnia, Sixti V. Pontificis Maximi jussu diligentissime emendata. Accedunt selecta multa tum ex postrema Veneta editione, tum ex prodromo eruditissimo Fr. Benedicti a Cavalesio Ordinis Minorum Reformati. Editio accurate recognita, ad puram et veriorem testimoniorum Biblicorum emendationem denuo reducta, cura et studio A. C. Peltier Canonici ecclesiae Remensis, Tomus duodecimus. Parisiis MDCCCLXVIII (1868), pag. 511.
© Ultra montes (www.ultramontes.pl)
Cracovia MMVI, Kraków 2006
Reditus in indicem
Meditationum Vitae Christi