DIVI THOMAE AQUINATIS

 

DOCTORIS ANGELICI

 

TOTIUS

 

SUMMAE THEOLOGICAE

 

CONCLUSIONES

 

–––––––––––––––––––––––

 

 

PRIMAE PARTIS

 

SUMMAE THEOLOGICAE

 

CONCLUSIONES

 

~~~~~~~~~~~~~~~~~~~~

 

QUAESTIO XCI

 

De productione corporis primi hominis

 

IN 4 ARTICULOS DIVISA

 

1. – Utrum corpus primi hominis sit de limo terrae.

 

Co. – Quamvis homo, ut medium quoddam existens inter spirituales creaturas et corporales substantias, corpus habeat ex quatuor elementis compositum, peculiariter tamen (quia terra et aqua in corpore hominis abundant) de limo terrae, hoc est de terra aquae permixta, formatus dicitur.

 

2. – Utrum corpus humanum sit immediate a Deo productum.

 

Co. – Cum in prima rerum formatione nullum praecesserit humanum corpus cujus virtute per viam generationis aliud simile in specie formaretur, oportuit primum corpus hominis immediate a Deo formari.

 

3. – Utrum corpus hominis habuerit convenientem dispositionem.

 

Co. – Cum quilibet artifex intendat suo operi dispositionem optimam secundum praestitutum sibi finem inducere, recte dicitur corpus humanum formatum fuisse ab artifice Deo in optima dispositione; non simpliciter, sed secundum quod congruit animae rationali et ejus operibus.

 

4. – Utrum convenienter corporis humani productio in Scriptura describatur.

 

Co. – Quoniam quae principaliter intendimus cum majori deliberatione et studio facere consuevimus, hinc est quod productionis corporis hominis, propter quem alia facta sunt, specialem modum Scriptura expresserit.

 

–––––––––––

 

 

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 56-57.

 
© Ultra montes (www.ultramontes.pl)
Cracovia MMXI, Kraków 2011

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: