DIVI THOMAE AQUINATIS

 

DOCTORIS ANGELICI

 

TOTIUS

 

SUMMAE THEOLOGICAE

 

CONCLUSIONES

 

–––––––––––––––––––––––

 

 

PRIMAE SECUNDAE

 

SUMMAE THEOLOGICAE

 

CONCLUSIONES

 

~~~~~~~~~~~~~~~~~~~~

 

QUAESTIO XIX

 

De bonitate et malitia actus interioris voluntatis

 

IN 10 ARTICULOS DIVISA

 

1. – An bonitas voluntatis dependeat ex objecto.

 

Co. – Cum bonum et malum sint per se differentiae actus voluntatis, differentia autem speciei in actibus sit secundum objecta, sequitur bonitatem et malitiam secundum objecta attendi debere.

 

2. – Utrum bonitas voluntatis dependeat ex solo objecto.

 

Co. – Cum objectum per se actui voluntatis bonitatem afferat, ex ipso solo, et non ex circumstantiis, bonitas voluntatis dependet.

 

3. – Utrum bonitas voluntatis dependeat ex ratione.

 

Co. – Cum bonitas voluntatis pendeat ex objecto per rationem sibi oblato, ex ipsa ratione ejusdem bonitatem pendere oportet.

 

4. – Utrum bonitas voluntatis dependeat ex lege aeterna.

 

Co. – Cum ratio humana ad legem aeternam comparetur ut causa secunda primae subordinata, necesse est voluntatis humanae bonitatem magis a lege aeterna quam a ratione dependere.

 

5. – Utrum voluntas discordans a ratione errante sit mala.

 

Co. – Quaevis voluntas a ratione sive recta sive errante discordans, semper est mala.

 

6. – Utrum voluntas concordans rationi erranti sit bona.

 

Co. – Voluntas concordans rationi erranti circa ea quae quis scire tenetur, semper est mala.

 

7. – Utrum voluntatis bonitas in his quae sunt ad finem dependeat ex intentione finis.

 

Co. – Bonitas voluntatis in his quae ad finem sunt ex ipsa intentione finis dependet.

 

8. – Utrum quantitas bonitatis vel malitiae in voluntate sequatur quantitatem boni vel mali in intentione.

 

Co. – Quantitas bonitatis voluntatis non semper sequitur quantitatem bonitatis intentionis, sed malitiae quantitas est secundum quantitatem malitiae intentionis.

 

9. – Utrum bonitas voluntatis dependeat ex conformitate ad voluntatem divinam.

 

Co. – Cum unumquodque bonum sit inquantum attingit ad propriam mensuram, manifestum est humanae voluntatis bonitatem ex conformitate ad divinam dependere.

 

10. – Utrum necessarium sit voluntatem humanam conformari voluntati divinae in volito, ad hoc quod sit bona.

 

Co. – Voluntas humana tenetur divinae conformari voluntati in volito formaliter, non autem materialiter.

 

–––––––––––

 

 

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 89-90.

 

© Ultra montes (www.ultramontes.pl)
Cracovia MMXIV, Kraków 2014

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: