THOMAE A KEMPIS

 

DE IMITATIONE CHRISTI

 

LIBRI QUATUOR

 

TEXTUM EDIDIT,

 

C O N S I D E R A T I O N E S

 

AD CUIUSQUE LIBRI SINGULA CAPITA EX CETERIS EIUSDEM

THOMAE A KEMPIS OPUSCULIS COLLEGIT ET ADIECIT

 

HERMANNUS GERLACH

 

––––––––

 

LIBER I.

 

ADMONITIONES AD SPIRITUALEM VITAM UTILES

 

–––––

 

CAPUT IV.

 

De providentia in agendis

 

1. Non est credendum omni verbo nec instinctui; sed caute et longanimiter res est secundum Deum ponderanda. Pro dolor, saepe malum facilius quam bonum de alio creditur et dicitur, ita infirmi sumus. Sed perfecti viri non facile credunt omni enarranti, quia sciunt infirmitatem humanam ad malum proclivam et in verbis satis labilem.

 

2. Magna sapientia, non esse praecipitem in agendis, nec pertinaciter in propriis stare sensibus. Ad hanc etiam pertinet, non quibuslibet hominum verbis credere, nec audita vel credita mox ad aliorum aures effundere. Cum sapiente et conscientioso viro consilium habe; et quaere potius a meliore instrui, quam tuas adinventiones sequi. Bona vita facit hominem sapientem secundum Deum et expertum in multis. Quanto quis in se humilior fuerit et Deo subiectior, tanto in omnibus erit sapientior et pacatior.

 

 

Consideratio

 

Quia saepe diversa percipis et nova tibi plerumque dicuntur, non facile credas, difficilius ea consequenter aliis dicas, et multo sit melius, si omnino sileas. Quid ad te? Iesum sequere et sine mortuos sepelire mortuos suos (1).

 

Ad eruditionem tuam habe praemeditationem aliquam prudentem circa agenda. Aliqui sunt tardiores, aliqui quodammodo praecipites in factis suis. Tardi saepe bona omittunt aut partem operis inchoantes non perficiunt. Vivaciores vero, dum inconsiderate currunt, leviter impingunt. Unde in medio semper virtus consistit (2).

 

Si non vis decipi, noli laudibus stultis delectari. Novit Deus cor tuum: quam impurum sit et vanum. Ne credas adulanti; sed potius increpantem ausculta: qui bene consulit, dum tua corripit errata (3).

 

Eris prudens, si evitas videri prudens (4). Qui nimis sibi confidit, periculo se exponit. Consultius agit, qui experto et doctiori acquiescit. Consilium quaerere humilitatis est indicium. Saepe Deus per alium loquitur: quod homini per se non revelat (5).

 

–––––––––––

 

 

Thomae a Kempis De imitatione Christi libri quatuor. Textum edidit, Considerationes ad cuiusque libri singula capita ex ceteris eiusdem Thomae a Kempis opusculis collegit et adiecit Hermannus Gerlach. Editio tertia aucta et emendata. CUM APPROBATIONE REV. ARCHIEP. FRIBURGENSIS. Friburgi Brisgoviae. SUMPTIBUS HERDER, TYPOGRAPHI EDITORIS PONTIFICII. [1909], pp. 15-17.

 

Notae:

(1) De fideli dispensatore c. l, § 15.

 

(2) Ib. § 7.

 

(3) Libellus spiritualis exercitii c. 2, P. 2, p. 334, l. 17.

 

(4) De fideli dispensatore c. 1, § 8.

 

(5) Recommendatio humilitatis P. 2, p. 381, l. 16.

 
© Ultra montes (www.ultramontes.pl)
Cracovia MMIX, Kraków 2009

Reditus ad indicem
DE IMITATIONE CHRISTI

POWRÓT DO STRONY GŁÓWNEJ: